Łoś, jaki zajšoŭ u adzin z dvaroŭ na ŭskrainie Mahilova i pamior tam, byŭ šalonym. Daktary šukajuć usich, chto kantaktavaŭ z chvoraj žyviołaj, kab pryznačyć pryščepki.
Adnahadovy łoś zajšoŭ na vulicu 30 hadoŭ Pieramohi viečaram 19 maja. Adkul jon pryjšoŭ, dakładna nieviadoma. Chutčej za ŭsio, zajšoŭ ź lasnoha masiva, vykazali zdahadku dziaržinśpiektary achovy žyviolnaha i raślinnaha śvietu.
Spačatku łoś chadziŭ pad voknami šmatpaviarchovika — miascovyja žychary zrabili fota, a zatym pavaliŭsia pad drevam, lažaŭ i chrypieŭ. Jaho akružyli darosłyja i dzieci. Na adnym sa zdymkaŭ vidać, što sa škury žyvioły tyrčała ihołka — paźniej vyśvietliłasia, što žyviołu abiacškodzili śpiecyjalisty.
Łoś pamior. Jaho transpartavali ŭ zaasad. Pieršasnyja łabaratornyja analizy pakazali, što na šalenstva žyvioła nie chvareje, tamu tušu vyrašyli razabrać i puścić na korm vaŭkam. Adnak 24 maja śpiecyjalisty abłasnoj vieterynarnaj łabaratoryi vyśvietlili, što łoś ŭsio ž byŭ chvory na šalenstva.
- Tamu z 25 pa 29 maja pravodziłasia epidrasśledavańnie. Śpiecyjalisty centra hihijeny i epidemijałohii abyšli amal 500 kvater, apytali 357 miascovych žycharoŭ. Siarod ich tych, chto mieŭ kantakt z šalonaj žyviołaj, nie vyjaŭlena. A svojskija žyvioły — 18 sabak, 21 kotka, pa słovach ich haspadaroŭ, ad šalenstva pryščepleny, - raspaviała TUT.BY namieśnik hałoŭnaha lekara palikliniki № 9 Natalla Čarnuševič. - Z šalonaj žyviołam, adnak, kantaktavali ludzi — dzieci, darosłyja, - heta bačna pa fatahrafijach u sacsietkach i kamientarach pad imi.
Miasa šalonaha łasia ŭtylizavali - na korm drapiežnikam zaasada jano nie pajšło.
Dla praviadzieńnia vakcynacyi darosłym možna źviartacca kruhłasutačna ŭ haradski traŭmapunkt, dzieciam da 18 hadoŭ — u traŭmapunkt abłasnoj dziciačaj balnicy. Usiu infarmacyju možna atrymać pa telefonach zanalnaha centra hihijeny i epidemijałohii: (8 0222) 23-74-77 i 23-75-33 abo ŭ svajoj terytaryjalnaj paliklinicy.
Dziesiać śpiecyjalistaŭ, jakija zajmalisia transparciroŭkaj tušy łasia i jaje utylizacyjaj, užo prachodziać kurs prafiłaktyčnych pryščepak ad šalenstva. Pryščepku robiać u vobłaść plača ŭ dzień zvarotu i na 3-i, 7-y, 14-y, 30-y, 90-y dzień paśla kantaktu z šalonaj žyviołam - usiaho šeść injekcyj.
Kamientary