Kiraŭnik pasolstva ZŠA: Heta nie naša zadača — pryvieści inviestaraŭ u Biełaruś, patrebnyja źmieny ŭ krainie
Biełarusi treba palepšyć svoj imidž za miažoj, kab zamiežnyja inviestary nie dzivilisia ŭbačanamu, kali prylatajuć pieršy raz u krainu. Pra heta zajaviŭ pavierany ŭ spravach ZŠA ŭ Biełarusi Robiert Rajli, vystupajučy na kanfierencyi ab ekanamičnaj biaśpiecy ŭ ramkach inicyjatyvy «Minski dyjałoh».
Pavierany raspavioŭ, što niadaŭna sustrakaŭsia z kiraŭnikom minskaha aeraporta.
— Ja skazaŭ jamu, što dla tych zamiežnikaŭ, chto nikoli nie byvaŭ u Biełarusi, aeraport — pieršaje ŭražańnie ab krainie. I heta dobraje ŭražańnie, novy pryjemny aeraport, dobryja aeraporty vielmi zručnyja. Mnohija ludzi ździŭleny.
Jany jašče bolš dziviacca, praciahnuŭ Rajli, kali traplajuć u Minsk.
— I heta dobra. Usie lubiać pryjemnyja siurpryzy, ja lublu pryjemnyja siurpryzy. Ale čamu ludzi ździŭleny? Bo jany pryjechali siudy z peŭnym ujaŭleńniem [pra Biełaruś]. I jano nie vielmi pazityŭnaje. Dobra być adkrytymi dla biznesu, ale, jak i restaranu treba rabić niešta jašče, kab pryciahnuć klijentaŭ, krainy pavinny pracavać, kab pryciahnuć inviestaraŭ. Heta nie zadača amierykanskich, niamieckich ci jeŭrapiejskich uładaŭ — pryvieści inviestaraŭ u Biełaruś. Heta tak nie pracuje.
Pa słovach amierykanskaha dypłamata, u Biełarusi patrebnyja źmieny, bo doŭhaterminovyja inviestary čakajuć ad luboj krainy dobra pracujučych instytutaŭ, viaršenstva prava, niezaležnych sudoŭ.
— Heta toje, što abaraniaje ich inviestycyi. Ja abmiarkoŭvaju hetuju temu ŭ Biełarusi z usimi, kim mahu: ź ministrami ekanomiki, zamiežnych spraŭ, finansaŭ, ministram unutranych spraŭ. Usio heta razumiejuć. Pytańnie, što rabić, moža vyklikać sprečki, ale ŭsie razumiejuć, što patrebnyja źmieny. Metaj hetaj pracy pavinna być toje, kab ludzi, jakija prylatajuć u minski aeraport u pieršy raz, bačyli jakraz toje, čaho čakali.
Rajli pierakanany, što heta ŭmacuje jak ekanamičnuju biaśpieku, tak i niezaležnaść Biełarusi.
Kamientary