U Minsku prezientavali knihu ab pryčynach pośpiechaŭ Finlandyi
«100 sacyjalnych inavacyj ź Finlandyi» heta zbornik karacielek ad finskich VIP-aŭ — palitykaŭ, hramadskich dziejačoŭ, aŭtaraŭ sacyjalnych noŭ-chaŭ. Sabraŭ ich pad adnu vokładku deputat parłamienta, dacent miedyčnych navuk Iłka Tajpała. Pierakłaŭ na biełaruskuju Jakub Łapatka. Vydaŭ Uładzimir Siŭčykaŭ.
Vydaviec na minskaj prezientacyi ŭ Šviedskim centry patłumačyŭ: «Finlandyja zajmaje pieršyja miescy ŭ Jeŭropie i navat u śviecie pa ŭzroŭniu adukacyi, jakaści žyćcia, minimalnaści karupcyi. U Biełarusi hetaja kniha budzie karysnaja kiraŭnikam roznaha ranhu, ale i moładzi, — navyrast. Nieŭzabavie addamo jaje ŭ biblijateki i kniharni. Zrobim tak, kab košty byli dastupnyja».
Kniha moža ździvić. Voś niekalki prykładaŭ.
Finy — usie piać z pałovaj miljonaŭ — mohuć adnačasova pajści ŭ saŭnu.
U krainie ich bolš za dva miljony! Saŭny jość navat u šmatkvaternych damach. U saŭnach prymalisia i prymajucca važnyja dziaržaŭnyja rašeńni. Faktyčna, usie paślavajennyja prezidenty Finlandyi byli vialikimi amatarami paru.
Finy źjaŭlajucca vynachodnikami adnapałatnaha parłamientu, kaalicyjnaha ŭradu, kvot dla žančyn.
Pry nieabchodnaści, jany płaciać asobam, jakija dahladajuć svaich niamohłych rodzičaŭ. Vypłaty składajuć ad 300 da 600 jeŭra.
Finy zmahli za niekalki hadoŭ pamienšyć udvaja — z 1200 da 600 — kolkaść darožna-transpartnych zdareńniaŭ sa śmiarotnym sychodam. Adnoj ź mier była prakładka 600 kiłamietraŭ vieładarožak.
Bolš čym udvaja była źnižanaja za 10 hadoŭ kolkaść chvorych na šyzafreniju. Dla hetaha sutnasna pamianiali charaktar uzajemin z chvorymi, pačali bolš užyvać ambułatornaje lačeńnie.
Finy adnosna lohka zdabyli niezaležnaść ad Rasii 100 hadoŭ tamu.
Ale potym im daviałosia adbivacca ad vajaŭničaj susiedki. U Zimniaj vajnie 1939 hoda napačatku ŭ ich amal nie było tankaŭ i supraćtankavych harmat. Finskija vajskoŭcy zamovili na likiora-vodačnych zavodach sotni tysiač pustych butelek i pačali raźlivać u ich zapalnuju sumieś. Uručnuju heta akazałasia marudna. Prystasavali linii pa raźlivu ałkaholu. Tolki na zavodzie ŭ Rajiamiakach raźlili bolš za paŭmiljona butelek. Pieršyja butelki zakryvalisia «cyvilnymi» korkami z ukazańniem adrasa zavoda. Savieckija samaloty razbambili zavod. Ale vytvorčaść udałosia praciahnuć. Taksama daviałosia naładzić vypusk admysłovych «štarmavych» zapałak.
Biełarusam cikava daviedacca, što i ŭ finaŭ isnuje taki zvyčaj, jak tałaka. Tanha finy ličać arhiencinskim, ale i finskim tancam.
Jak bačycie, nazvaŭ ź dziasiatak cikavostak, a ich sotnia.
Na abiedźviuch minskich prezientacyjach knihi (druhaja była 31 traŭnia ŭ ateli Double Tree by Hilton, z udziełam pradstaŭnikoŭ AAN) byli pasoł Finlandyi Krystar Mikielsan i kiraŭnik Adździaleńnia pasolstva Finlandyi ŭ Minsku Łaŭry Pułała. Spadar Pułała zaprasiŭ prysutnych na śviatočnyja mierapryjemstvy z nahody finskaha jubileju ŭ stalicy Biełarusi.
Pasoł Sidarenka pakončyŭ z saboj, nie vytrymaŭ dopytaŭ KDB34
Kamientary