Mazyrskija aktyvisty zmahańnia suprać arendy Prypiaci vyrašyli dakazać, što dahladać bierahi raki i vykonvać inšyja patrebnyja mierapryjemstvy na ahulnanarodnym pryrodnym abjekcie mohuć nie tolki arandatary, ale i hramadskaść.
Situacyja z namieram uładaŭ u Mazyry zdać u arendu 91 kiłamietr raki Prypiać i 300 hiektaraŭ pojmiennych azioraŭ praciahvaje abrastać precedentami.
Jak paviedamiŭ Homielski Zialony partał, u adkaz na pratesty mazyrčukoŭ Ministerstva sielskaj haspadarki i charčavańnia Biełarusi prapanuje ŭvohule admovicca ad arendy rek i kanałaŭ va ŭsioj krainie. Prajekt adpaviednaha narmatyŭnaha akta ŭžo ŭniesieny na razhlad kiraŭnika dziaržavy. Takim čynam viedamstva miarkuje źnizić sacyjalnuju napružanaść u hramadstvie, jakuju vyklikaje arenda ahulnanarodnych pryrodnych abjektaŭ.
Raniej orhany ŭłady ŭ Mazyry tłumačyli, što arenda raki nieabchodnaja dla taho, kab było z kaho spytać za stan bierahoŭ, za praviadzieńnie inšych mierapryjemstvaŭ. Ale mazyrskaja hramadskaść vyrašyła dakazać uładzie, što svaju raku ludzi zmohuć dahledzieć i sami.
Aktyvisty zmahańnia suprać arendy Prypiaci vyrašyli pravieści 10 červienia na bierazie raki admysłovuju akcyju — kviest, padčas jakoha ŭ formie spabornictva prybrać kala vady śmiećcie. Žadańnie ŭziać udzieł u akcyi vykazali mnohija rybaki i nie abyjakavyja da ekałohii žychary Mazyra. Ab namiery pravieści akcyju rehijanalny kaardynatar inicyjatyvy «Zialony dazor» Pavieł Nazdra 1 červienia elektronnym listom abvieściŭ Mazyrski rajvykankam.
Jak raspavioŭ karespandentu «Našaj Nivy» Pavieł Nazdra, čynoŭniki vyrašyli, što kviest pa ŭborcy śmiećcia na bierazie Prypiaci — heta masavaje mierapryjemstva, i paviedamili aktyvistu, što dla jaho praviadzieńnia arhanizatary musili źviarnucca za dva tydni ŭ vykankam pa adpaviedny dazvoł.
«Tady ja skazaŭ pradstaŭnikam vykankama, što heta samy zvyčajny subotnik, jaki ŭsiaho tolki miarkujecca pravieści ŭ hulniavoj formie, ale, kali heta ličycca masavym mierapryjemstvam, to my jaho admianiajem i heta, najchutčej, vykliča skandalnuju situacyju i niezadavolenaść ludziej, — havoryć Pavieł. — Na heta mnie skazali: «Dyk čamu ž vy adrazu nie napisali «subotnik», a ŭžyli niejkaje niezrazumiełaje słova «kviest»? Subotnik možna pravodzić! Heta nie masavaje mierapryjemstva!»
I choć piśmovaha dazvołu na praviadzieńnie akcyi ad vykankama arhanizatary nie atrymali, tym nie mienš, ułada daručyła miascovym kamunalnikam nakiravać da miesca praviadieńnia kviesta-subotnika śmiećciavoz, kab vyvieźci sabranaje śmiećcie.
Akcyja prajšła ŭ subotu bieź niejkich ekscesaŭ. Udzielniki, jakich na bierah Prypiaci całkam dabraachvotna pryjechała amal 40 čałaviek, sabrali kala 12 kubamietraŭ śmiećcia, a samych aktyŭnych prybiralščykaŭ arhanizatary zaachvocili pryzami. Pry hetym mnohija ŭdzielniki pryborki śmiećcia asabliva adznačali, što ŭ ludziej, dziakujučy aktyŭnaj i šmatkolkasnaj kampanii pa supraćdziejańni arendzie raki, usio bolš i bolš vyśpiavaje ŭ śviadomaści pačućcio adkaznaści za navakolle, pačućcio taho, što raka — ahulnaja, i hramadskaść moža ŭziać na sabie adkaznaść za stan takoha pryrodnaha abjektu biez udziełu dziaržaŭnych orhanaŭ ci niejkich arandataraŭ.
