Śpiavak Źmicier Vajciuškievič prezientavaŭ klip na pieśniu «Kali zaŭtra roŭna ŭ šeść» češskaha barda Jaramira Nohavicy, pierakładzienuju na biełaruskuju movu Vitalom Voranavym i vydadzienuju na albomie «Kamieta». Animacyjny klip stvaryŭ režysior Siarhiej Kastrycki.
«Klip hety — multyplikat u čystym vyhladzie. Jahonaja ideja — pakazać tuju častku historyi, pra jakuju mała kažuć. Pra historyju Pieršaj suśvietnaj i pra biełarusaŭ, jakija vajavali za impieryju, taki byŭ čas. Pamiaci našych ziemlakoŭ i pryśviačajecca hetaja praca», — skazaŭ režysior z nahody prezientacyi na TuzinFM.
Źmicier Vajciuškievič u hetaj suviazi pravodzić paraleli z sučasnaściu: «My absalutna nieabaronienyja pierad vajnoju ŭ naš čas. Vajna znoŭ pryjšła, jana zusim pobač, va Ukrainie. I jana pahražaje niebiaśpiekaju ŭ tym liku i biełarusam».
Vykanaŭca i režysior nie syšlisia ŭ niekatorych momantach roliku, ale Źmicier usio ž «pryniaŭ pracu». «Mnie padabajecca toje, što robić Kastrycki, jon talenavity i bačyć śviet pa-svojmu», — zaznačaje śpiavak.
