15 červienia na vulicy Papanina ŭ Breście milicyja ŭ cyvilnym žorstka zatrymała čaćviarych.
Try aŭtamabili «zacisnuli» čaćviorty, prymusova spynili, zatym ź ich vyskačyli dužyja chłopcy, raźbili škło ŭ čaćviortaj mašyny, adtul vyvieli dvuch mužčyn i dźviuch žančyn, pakłali ich tvaram na ziamlu ŭ kajdankach, paviedamlaje miascovy partał «Virtualny Brest».
Pry hetym adrazu dužyja chłopcy źviarnuli ŭvahu na tych, chto staŭ zdymać toje, što adbyvajecca na mabilnyja telefony. Bo pieršapačatkova ludzi vykazali zdahadku, što heta niejkija «razborki» ŭ styli 90-ch, usio tak i vyhladała zboku. U vyniku va ŭsich, chto zdymaŭ videa ci fota, adabrali telefony.
Usie, chto pazbaviŭsia svajoj techniki, raskazali «Virtualnamu Brestu», što im nie pakazali nijakich paśviedčańniaŭ i navat nie nazvalisia, prosta zabrali telefony z ruk. U dalejšym, pad kantrolem, pry ŭmovie vydaleńnia fota i videa telefony viarnuli.
U pres-słužbie bresckaj milicyi «Našaj Nivie» paćvierdzili fakt zatrymańnia. Pracavali supracoŭniki milicyi ŭ cyvilnym. Usich čaćviarych «viali» ŭžo niekatory čas, zatrymanych padazrajuć u zachoŭvańni i raspaŭsiudzie narkotykaŭ. Pry zatrymańni byli kanfiskavanyja narkatyčnyja rečyvy, jany adpraŭleny na ekśpiertyzu.
