Brytanski ministr pa vychadzie ź Jeŭrasajuza Devid Devis i hałoŭny pieramoŭščyk ES Mišel Barni pačali ŭ Bruseli pieramovy ab «breksicie», piša VVS.
U pieršy dzień pieramoŭ ich udzielniki zasiarodziacca na arhanizacyjnych pytańniach: jak časta jany buduć sustrakacca i ŭ jakim paradku buduć abmiarkoŭvacca hałoŭnyja temy pieramoŭ.
«My pačynajem hetyja pieramovy ŭ pazityŭnym i kanstruktyŭnym klučy, kab u budučyni pryjści da stvareńnia mocnaha i asablivaha partniorstva pamiž nami i našymi jeŭrapiejskimi sajuźnikami i siabrami», — zajaviŭ Devis.
Barni pahadziŭsia z tym, što kanstruktyŭny pačatak pieramoŭ maje žyćciova važnaje značeńnie dla ŭsiaho pracesu «breksitu. Na jaho dumku, u pieršuju čarhu pierahavorščyki pavinny razabracca z pytańniami ab statusie ekspataŭ i miažy pamiž Irłandyjaj i Paŭnočnaj Irłandyjaj.
Jašče adno pytańnie — ab sumie vypłat, jakija Brusiel raźličvaje atrymać ad Łondana — u jakaści pieršaradnaha Barni nie nazvaŭ.
Pieramovy buduć iści pa schiemie, jakaja źjaŭlajecca pažadanaj dla ES: spačatku buduć abmiarkoŭvacca ŭmovy vychadu Brytanii z abjadnańnia, i tolki potym — pytańni ab budučym supracoŭnictvie i handlovym pahadnieńni.
Pytańnie «šlubarazvodnaha ŭrehulavańnia», pa niekatorych padlikach, budzie kaštavać da 50 młrd funtaŭ sterlinhaŭ (bolš za 57 młrd jeŭra). Pry hetym, pavodle acenak Financial Times, «breksit» moža abyścisia Brytanii ŭ 100 młrd jeŭra z-za ŭzmacnieńnia žorstkaści patrabavańniaŭ z boku krain-členaŭ sajuza.
Tak, Polšča i Francyja mohuć zapatrabavać sielskahaspadarčych subsidyj krainam ES, a Hiermanija — adčužeńnia brytanskich dolaŭ u jeŭrapiejskich aktyvaŭ: nieruchomaści, bankaŭskich depazitach i hetak dalej.
Devis adnak užo zajaviŭ, što Brytanija nie budzie płacić 100 młrd jeŭra za razvod. Karaleŭstva zapłacić, ale tolki toje, što praduhledžana jurydyčna, a nie «prosta toje, što choča ES», zajaviŭ ministr.
