Cieła 59-hadovaj minčanki Ludmiły Niedasieka, jakaja adpačyvała ŭ Bałharyi, za dzień da vyletu znajšli ŭ numary hatela. Ale siamja daviedałasia pra ŭsio tolki na čaćviorty dzień.
«Uviečary [u subotu, 24 červienia] ja telefanavała mamie daviedacca, ci prylacieła — telefon byŭ niedastupny. U niadzielu taksama, ale my dumali jana, jak zvyčajna, adsypajecca paśla pajezdki. Užo ŭ paniadziełak ź milicyjaj uzłamali zamok u jaje kvateru, tam jaje nie było. Tady my daviedalisia praz znajomych z avijakampanii, što jana nie sadziłasia na zvarotny samalot. U aŭtorak ranicaj tyja samyja supracoŭniki milicyi pazvanili: maŭlaŭ, «prabili» ŭ strachavalnikaŭ [infarmacyju], što mama pamierła 24 červienia», — raspaviała TUT.BY dačka niabožčycy Nadzieja Niedasieka.
Cieła znajšli ŭ subotu, 24 červienia. Adrazu paviedamili turapierataru ŭ Bałharyi i strachavoj kampanii ŭ Minsk.
Bałharski turapieratar paviedamiŭ pra heta minskaj turfirmie, jakaja pradała pucioŭku, tolki na treci dzień.
U pasolstvie Biełarusi ŭ Bałharyi raspaviali, što infarmacyju pra śmierć biełaruski atrymali tolki ranicaj u paniadziełak [na treci dzień] faksam ź Ministerstva achovy zdaroŭja Bałharyi. «Adrazu ž prainfarmavali našy MZS i HUUS Minharvykankama. Tak, nakładka atrymałasia. Milicyja ŭ vyniku paviedamiła rodnym. Ale navat u HUUS nam kazali, što pa znojdzienych telefonach nie adrazu ŭdałosia źviazacca z rodnymi», — raspaviali ŭ pasolstvie.
A strachavaja kampanija infarmavać rodnych nie pavinna. Ich praca — razhledzieć vypadak (strachavy abo nie), a taksama vykanać svaje dalejšyja abaviazacielstvy, rastłumačyli ŭ Biełdziaržstrachu.
Minuŭ užo tydzień, ale cieła žančyny jašče ŭ Bałharyi. Siamja Niedasiekaŭ niepakoicca, ci dapamohuć strachavalniki z kampiensacyjaj vydatkaŭ. Pryčynaj śmierci užo nazvany «vostry pankreatyt». Siamja baicca, ci pryznajuć vypadak strachavym.
— Daviedalisia, što naprykład ź Ispanii pryvieźci cieła kaštuje 5 tysiač jeŭra. Tak, z Bałharyi tańniej. Ale ŭ nas niama i takich hrošaj, — tłumačyć dačka pamierłaj.
Siamja baicca, što vypadak mohuć nie pryznać strachavym, kali chvaroba z padstraŭnikavaj załozaj budzie pryznanaja chraničnaj. Abo ŭ kryvi vyjaviać ałkahol (što nie vyklučana na adpačynku). Supracoŭnik Biełdziaržstrachu tłumačyć:
— Pa standartnym varyjancie strachavańnia, u vypadku abvastreńnia chraničnaha zachvorvańnia — vypłata lubaja (lačeńnie, repatryjacyja) praduhledžana ŭ miežach 10% ad strachavoj sumy.
Heta značyć, pry strachoŭcy na sumu 30 tysiač jeŭra — vypłaty składuć da 3 tysiač.
A voś praz ałkahol kampanija moža admović u kampiensacyi tolki, kali heta źjaŭlajecca niepasrednaj pryčynaj śmierci (naprykład, atručvańnie ci praźmiernaje ŭžyvańnie — što pavinny paćviardžać dakumienty ad miedykaŭ, palicyi i h.d.). Kali ž čałaviek byŭ pjany i ŭ jaho zdaryŭsia infarkt — tut najaŭnaść pryčynna-śledčaj suviazi ŭstaloŭvaje ekśpiert.
Konsulstva Respubliki Biełarusi ŭ Bałharyi pastajanna na suviazi ź siamjoj. Siońnia spadziajucca atrymać apošnija dakumienty.
— Kali vypadak pryznajuć strachavym, to zvyčajna ŭsie astatnija pracedury zajmajuć paru dzion. Tym bolš usio adbyłosia ŭ horadzie Burhas, adkul na Minsk jość pramyja čartarnyja rejsy, — raspaviali TUT.BY u konsulskim adździele.