Brytanski sud upieršyniu pryznaŭ hramadzianina krainy vinavatym u terarystyčnaj dziejnaści ŭ suviazi ź jaho udziełam u kanflikcie na Danbasie, paviedamlaje VVS. Sud u Mančestery prysudziŭ brytanca Biendžamina Stymsana, jaki znachodziŭsia ŭ składzie uzbrojenych farmavańniaŭ «DNR» i «ŁNR», da piaci hadoŭ i čatyroch miesiacaŭ turmy.
Sudździa ŭdakładniŭ, što pryhavorvaje Stymsana da vaśmi hadoŭ źniavoleńnia, ale adymaje treć hetaha terminu za pryznańnie viny.
Bok abvinavačvańnia kazaŭ ab tym, što Stymsan mieŭ «namier pry sadziejničańni inšych asob ździejśnić akty teraryzmu šlacham ustupleńnia ŭ šerahi sieparatystaŭ, jakija supraćstajać uładam Ukrainy, i słužby ŭ jakaści bajca sieparatystaŭ». Adnak sudździa nie znajšoŭ dokazaŭ taho, što Stymsan niepasredna ŭdzielničaŭ va ŭzbrojenym kanflikcie.
Sudździa pastanaviŭ, što Biendžamin Stymsan nie maje ekstremisckich pohladaŭ i nie ŭjaŭlaje ciapier niebiaśpieki dla nasielnictva Brytanii.
Pieršapačatkova Stymsan taksama abvinavačvaŭsia ŭ padrychtoŭcy i ździajśnieńni terarystyčnych aktaŭ, ale zatym hetyja abvinavačvańni byli źniatyja.
Biendžaminu Stymsanu 41 hod. Jon naradziŭsia i vyras na poŭnačy Anhlii. Vosieńniu 2015 hoda žurnalisty Bi-bi-si sustreli jaho niepadalok ad Debalcava.
Jon raspavioŭ, što adpraviŭsia na Danbas, bo doma nie bačyŭ nijakich pierśpiektyŭ. Na toj momant jon užo paŭtara hoda siadzieŭ biez pracy. Ale nie mienš važnymi dla brytanca byli i ideałahičnyja pryčyny.
«Ja liču toje, što adbyvajecca tut, zachodniaj impieryjalistyčnaj ahresijaj suprać Rasii, suprać ludziej, jakija nie hulajuć u zachodnija hulni», — skazaŭ jon tady Bi-bi-si. U chodzie intervju Stymsan prytrymlivaŭ karabin, jaki stajaŭ pobač z kresłam. Pry hetym jon kazaŭ, što za try miesiacy, praviedzienyja na ŭschodzie Ukrainy, jon jašče ni razu nie stralaŭ u voraha.
Na sudzie Biendžamin Stymsan admaŭlaŭ svoj udzieł u vajennych dziejańniach. Pa jaho słovach, jon pravioŭ na ŭschodzie Ukrainy čatyry miesiacy, pracujučy kiroŭcam chutkaj dapamohi.
Miarkujučy pa materyjałach spravy, u čas jaho znachodžańnia na Danbasie brytaniec pravioŭ niekalki tydniaŭ u balnicy z-za prablem z straŭnikam, a zatym davoli šmat času znachodziŭsia ŭ tyłavym raźmiaščeńni farmavańniaŭ «DNR», tolki epizadyčna vyjazdžajučy na pieradavuju.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym1
Kamientary