Na Krasnaj płoščy razahnanaja akcyja suprać uvodu rasiejskich vojskaŭ u Hruziju. Pratest ładzili siamiora junakoŭ.
U niadzielu siem junakoŭ vyjšli na Krasnuju płošču Maskvy, kab vykazać pratest suprać uvodu rasiejskich vojskaŭ na terytoryju Hruzii.
Akcyja, jakaja atrymała nazoŭ «Dzień naradžeńnia Svabody», była prymierkavanaja da 40‑ch uhodkaŭ znakamitaj akcyi pratestu siami savieckich dysidentaŭ suprać uvodu vojskaŭ SSSR u Čechasłavakiju.
Udzielniki akcyi — Julija Bašynava, Valancina Čubarava, Vienijamin Dmitroškin, Mikałaj Zbarašenka, Siarhiej Kastusioŭ, Ivan Ninienka i Dzianis Šadryn — sieli na płoščy, razharnuŭšy transparant «Za vašu i našu svobodu!» Na praciahu niekalkich chvilinaŭ jany skandavali lozunhi i kantaktavali z žurnalistami. Zatym da ich padyšli supracoŭniki milicyi i biez tłumačeńnia pryčynaŭ pačali zatrymańnie.
U liku zatrymanych try ŭdzielnika mierapryjemstva — Vienijamin Dmitroškin, Mikałaj Zbarašenka i Ivan Ninienka, — a taksama čaćviora žurnalistaŭ, što aśviatlali mierapryjemstva. Siarod zatrymanych žurnalistaŭ — karespandent «Novaj Haziety» Jelena Kaściučenka, žurnalist «Viedamaściaŭ» Ivan Rusajeŭ, a taksama apieratary «Hraniaŭ‑TV» Dmitryj Borka i kanała The New Times Dmitryj Šybajeŭ. Pry zatrymańni supracoŭniki milicyi złamali fotaaparat Jeleny Kaściučenki, paviedamlajuć Hrani.ru.
Usie zatrymanyja byli dastaŭlenymi ŭ AUS «Kitaj‑horad». Prykładna praz hadzinu paśla zatrymańnia byli adpuščanymi žurnalisty. Pry hetym supracoŭniki milicyi prymusili ich źniščyć fota‑ i videamateryjały ab akcyi pratestu. Zatrymanyja aktyvisty zastajucca ŭ AUS i vinavaciacca pa artykule 20.2 Administracyjnaha kodeksu ŭ parušeńni ŭstalavanaha paradku arhanizacyi albo praviadzieńni zboru, mitynhu, demanstracyi, šeścia abo pikietu.
Ciapier čytajuć
«Biełarusy dastatkova mudryja, kab čakać». Sieviaryniec vystupiŭ u Vilni15
Kamientary