U subotu ŭviečary ŭ domie na Tałbuchina, 5 z treciaha paviercha abrynułasia bietonnaja padłoha bałkona. Plita ŭpała na bałkon susiedki paviercham nižej, paviedamlaje tut.by.
U niadzielu ranicaj z druhoha i treciaha paviercha bałkony źniali. Abodva bałkony byli niezašklonyja. Aharodžy, jakija zastalisia ad ich, pastavili ŭ dvary. Vokny zapiačatali. Na ŭsich padjezdach visiać abjavy pra toje, što 24 lipienia budzie prachodzić abśledavańnie ŽEU pa ŭsim domie.
Pa słovach mužčyny, jaki pražyvaje ŭ kvatery na trecim paviersie, niekalki miesiacaŭ tamu pad im tresnuŭ bałkon. Paśla čaho jon pierastaŭ tudy vychodzić i napisaŭ skarhu ŭ ŽES, ale jamu adkazali, što pracy praviaduć da vieraśnia.
— Ja bačyŭ, što bałkon realna adyšoŭ ad ściany.
A voś susiedka Albina Jafimaŭna paviercham nižej, jakaja zaraz taksama biez bałkona, bolš zaniepakojenaja situacyjaj.
— Učora ŭviečary lažała, čuju, štości jak hrymnie! Susiedzi patelefanavali, sfatahrafavali, usio mnie pakazali. Hladžu, na bałkonie — žach što! U hadzin dziesiać ja siońnia išła z carkvy, krany ŭžo tut usio prybirali i zdymali bałkony. Čałaviek 15 pryjechała.
Dom 1958 hoda pabudovy. U 2009-m tut rabili kapitalny ramont, ale bałkony nie ramantavali.
— Chiba možna tak niadbała stavicca da spravy? Nu vidać, što ich tak unizie paforbavali pabiełkaj, jano ŭžo ŭsia absypałasia! Chaj pravierać, chto hety dom prymaŭ, tamu što ŭ nas ničoha paśla kapramontu nie praviarali!
Albina Jafimaŭna kaža, što paśla kapitalnaha ramontu pisała skarhi ŭ vykankam ab tym, kab zrabili ramont bałkonaŭ. Ale nijakich rabot tak i nie zrabili.
