«Zmova suprać Rasii»: što pišuć rasijskija ŚMI pra sustreču Łukašenki i Parašenki
Internet-vydańni Rasii znoŭ vostra adreahavali na pieramovy ŭ Kijevie pamiž prezidentami Ukrainy i Biełarusi Piatrom Parašenkam i Alaksandram Łukašenkam. «Naša Niva» prapanuje ahlad najbolš adyjoznych publikacyj.
«Biełaruś imkniecca syści ad Rasii»
Sajt «Svabodnaja presa», jaki redahujuć viadomyja rasijskija piśmieńniki-čarnasociency Siarhiej Šarhunoŭ i Zachar Prylepin, źmiaščaje kałonku pad nazvaj «Sajuz Biełarusi i Rasii tresnuŭ u Kijevie».
«Na žal, Rasieja adnosna Biełarusi moža akazacca ŭ toj ža situacyi, što i ŭ svoj čas z Ukrainaj. U nas byli ŭpeŭnienyja, što ŭsie hetyja kulturnyja, moŭnyja, histaryčnyja i rodnasnyja skrepy źjaŭlajucca mahutnaj procivahaj lubomu nacyjanalizmu. I nam ničoha nie treba rabić u palityčnym płanie, kab utrymać partnioraŭ na rasiejskaj arbicie. Ukrainski prykład pakazaŭ, što heta zusim nie tak. I ŭ Biełarusi paŭtor hetaha scenara całkam mahčymy. Tym bolš, što biełaruskija ŭłady ŭziali kurs na addaleńnie ad Rasii», — kaža vydańniu dyrektar Centra kryzisnaha hramadstva, namieśnik zahadčyka kafiedry dziaržaŭnaj palityki MHU Maksim Vilisaŭ.
«Kali vy pačytajecie histaryčnyja padručniki ŭ Biełarusi, vy ŭbačycie, što pa ich biełaruskaja dziaržaŭnaść nijak nie źviazanaja z rasijskaj. Tam viaduć historyju ad Vialikaha Kniastva Litoŭskaha. A ŭsio astatniaje — heta Biełaruś u składzie Rasijskaj impieryi, zatym Savieckaha Sajuza, a zatym adradžeńnie jaje dziaržaŭnaści. Kali moładź, vyhadavanaja na takoj ideałohii, pryjdzie da ŭłady, jana ŭžo nie budzie ŭsprymać Rasiju jak naturalnaha partniora i sajuźnika. Chutčej, naadvarot», — praciahvaje Vilisaŭ.
«Parašenka stanie jeŭrapiejskim «mahilščykam» Łukašenki»
«Prezident Biełarusi, sam taho nie padazrajučy, padyšoŭ da niebiaśpiečnaj rysy, dazvoliŭšy svajmu ŭkrainskamu «siabru» maryć ab bolš ciesnym supracoŭnictvie i navat pra novuju rolu ŭ jeŭrapiejskim losie Minska. Choć całkam mahčyma, što Alaksandr Ryhoravič prosta hulaje z Kijevam «adpuskajučy paviesialicca na łužku», — piša vydańnie politobzor.com.
«Fars čystaj vady, asabliva kali ŭspomnić, što Parašenku vykinuli na jeŭrapiejskuju pamyjnicu ŭ hieapalityčnym płanie. Ale kali takija drobiazi prymušali praŭdzivaha majdanutaha patryjota admaŭlacca ad mary? Tym bolš Parašenka puskajecca va ŭsie ciažkija, kab choć ledź-ledź prypadniać dno rejtynhu i prademanstravać svaju važnaść, choć by dla ŭłasnaha statka», — piša niechta Juryj Makaranka.
«Łukašenka hrudźmi staŭ na abaronu Kijeva ad «ahresii»
Taki zahałovak dała čarnasocienskaje ahienctva «Rehnum». Aŭtar — niechta Jakaŭ Rudź. Mahčyma, novy psieŭdanim usim viadomaha Juryja Barančyka.
«Na pres-kanfierencyi pa vynikach aficyjnaha vizitu va Ukrainu prezident Biełarusi A. Łukašenka kazaŭ pra blizkaści biełarusaŭ i ŭkraincaŭ, ab ich kreŭnym svajactvie i histaryčnych suviaziach, siarod inšaha, zapeŭniŭšy haścinnych haspadaroŭ u tym, što nijakaja ahresija z boku bratniaj Biełarusi Ukrainie nie pahražaje, i pahražać nie budzie. Pra toje, ci aznačajuć hetyja harantyi, što ahresii nie budzie, bo jaje nichto nie rychtuje, abo tamu, što sam «Baćka» i biełaruski narod jaje nie dapuściać, vysoki hość zmaŭčaŭ. Daŭšy mahčymaść usim žadajučym rasstaŭlać kropki nad «i» pa hetym pytańni pa ich ŭłasnym mierkavańni. Dla narmalnaj śviadomaści, nie abciažaranaj kompleksami «majdana» i «ato», zrabić vybar na karyść varyjantu «nul ahresii» nie składzie asablivaj ciažkaści. Dla kijeŭskaha ž kiraŭnictva vybrać što-niebudź inšaje, akramia pahrozy ahresii z boku Rasiei, akazvajecca nie prosta vielmi prablematyčna, a naohuł naŭrad ci mahčyma».
«Kaho Łukašenka abdymaje krapčej — Parašenku ci Pucina?»
Takoje pytańnie zadaje vydańnie «Rosbałt». «Zrazumieła, što takija pavodziny Alaksandra Ryhoraviča zdolny vyklikać piakotku ŭ Kramli, ale jaho heta nie źbiantežyła. Bolš za toje, jon taksama zapeŭniŭ Parašenku ŭ tym, što ŭkraincy mohuć raźličvać na biełarusaŭ: «Kali my niešta ŭmiejem i možam zrabić dla našaj Ukrainy, my heta zrobim». Cikava, što? Zrazumieła, što RF «ahresaram» jon nie nazavie, dy i ŭ jakaści «dadatkovaha miratvorca» biełaruski lidar siabie nie prapanavaŭ, choć nie pasaromieŭsia pachvalić siabie za pradastaŭleńnie Minska ŭ jakaści pastajannaj placoŭki dla pieramoŭ pa ŭrehulavańni supraćstajańnia ŭ Danbasie».
«Zmova suprać Rasii»
Hazieta «Maskoŭski kamsamolec» dała słova vychadcu ź Biełarusi, ekśpiertu Vyšejšaj škoły ekanomiki Dźmitryju Bałkuncu. Ekśpiert vykazvaje absalutna fantasmaharyčnuju viersiju, što Łukašenka i Parašenka damovilisia pamiž saboj pieraškodzić palapšeńniu adnosin pamiž Maskvoj i Vašynhtonam.
«Na moj pohlad, siońnia i Alaksandr Łukašenka, i Piotr Parašenka nie zacikaŭlenyja ŭ dyjałohu abo, nie daj Boh, narmalizacyi adnosin Vašynhtona i Maskvy. Dla ich važna, kab biahučyja adnosiny dźviuch krain byli na takim ža nizkim uzroŭni, tamu što jany tady majuć mahčymaść manieŭravać pamiž Maskvoj i Zachadam. Asabliva heta tyčycca Biełarusi. I ŭ hetym rakursie Parašenka, ja ŭpeŭnieny, vykaža svaju ŭdziačnaść biełaruskamu kalehu za zachoŭvańnie pryncypovaj pazicyi pa Krymie i paŭdniovym uschodzie Ukrainy».
Prakuratura pra śmierć Miełkaziorava: žurnalist mieŭ chraničnuju chvarobu17
Prakuratura pra śmierć Miełkaziorava: žurnalist mieŭ chraničnuju chvarobu
Fiaduta — Kaleśnikavaj: Mašańka, ci viarniciesia na Miesiac, ci nie vučycie žyć tych, chto stamiŭsia nabivać huzy ad čarhovaha nastupańnia na hrabli3535
Kamientary