ZŠA paviedamili ab paśpiachovym vyprabavańni pierachopnika balistyčnych rakiet
Złučanyja Štaty Ameryki paviedamili, što padčas vyprabavańniaŭ novaja systema supraćrakietnaj abarony paśpiachova źbiła cel, balistyčnuju rakietu siaredniaj dalekasiažnaści. Novuju systemu planujecca raźmiaścić u Paŭdniovaj Karei.
Jak paviedamiła Ahienctva supraćrakietnaj abarony ZŠA, rakietu, zapuščanuju z amerykanskaha vajskovaha samalota nad Cichim akijanam, sistema THAAD paśpiachova vyjaviła, adsačyła i pierachapiła. Heta było ŭžo piatnaccataje paśpiachovaje vyprabavańnie hetaj systemy.
Vyprabavańnie adbyłosia praz dva dni paśla taho, jak Paŭnočnaja Kareja, miarkujecca, užo druhi raz za karotki čas paśpiachova vyprabavała mižkantynentalnuju balistyčnuju rakietu, što, pavodle acenak, u vypadku zapusku pa aptymalnaj trajektoryi zmoža dasiahnuć značnaj častki kantynentalnaj terytoryi ZŠA.
Častka systemy THAAD ZŠA ŭžo raźmieščanaja ŭ Paŭdniovaj Karei pry papiarednim kiraŭnictvie hetaj krainy, kab być u stanie supraćstajać rakietna-jadziernaj pahrozie Paŭnočnaj Karei. Ale novy prezydent Paŭdniovaj Karei Mun Dže Jan spyniŭ dalejšaje razhortvańnie systemy, zajaviŭšy, što treba nanova acanić jaje mahčymy ŭpłyŭ na navakolnaje asiarodździe.
Taksama rezka suprać razhortvańnia hetaj systemy ŭ Paŭdniovaj Karei vystupajuć Kitaj i Rasieja. Pekin bačyć u joj destabilizacyju ŭ rehijonie, a Maskva — źniščeńnie stratehičnaha balansu va ŭsim śviecie, kali ŭličyć raźmiaščeńnia elementaŭ hetaj systemy PRA taksama i na Alascy.
Kamientary