1 žniŭnia byŭ aficyjna apublikavany ŭkaz №258, jaki Alaksandar Łukašenka padpisaŭ 28 lipienia i pavodle jakoha ŭ Biełarusi 1 vieraśnia likvidujecca ŭpraŭleńnie farmaceŭtyčnaj pramysłovaści Ministerstva achovy zdaroŭja i ad toj ža daty stvarajecca «chołdynh pa vytvorčaści farmaceŭtyčnaj pradukcyi».
Z ukazu stała viadoma, što kantralavać stvareńnie chołdynhu budzie Kamitet dziaržaŭnaha kantrolu. Ale ci budzie chołdynh niejkim čynam padnačaleny abo padspravazdačny Minzdaroŭja, z ukazu niezrazumieła. Raniej paviedamlałasia, što za ministerstvam pakinuć funkcyi rehulavańnia farmaceŭtyčnaj haliny.
Jakija pradpryjemstvy ŭvojduć u chołdynh, a jakija nie, taksama nieviadoma. Raniej paviedamlałasia, što «chołdynh budzie adkryty dla ŭvachodžańnia pradpryjemstvaŭ usich formaŭ ułasnaści i luboj viedamasnaj padnačalenaści».
Chołdynh, pavodle raniejšych paviedamleńniaŭ, maje zabiaśpiečyć «niezaležnaść orhanaŭ licenzijavańnia, dziaržaŭnaj rehistracyi lekavych srodkaŭ i sertyfikacyi vytvorčaści ad intaresaŭ vytvorcaŭ dziaržaŭnaj formy ŭłasnaści», a abjadnańnie pradpryjemstvaŭ u chołdynh dazvolić aptymizavać vydatki i strukturu kiravańnia, padvysić košt pradpryjemstvaŭ i ichnuju kankurentazdolnaść.
Kab stvaryć chołdynh u Biełarusi, treba atrymać dazvoł antymanapolnaha orhanu, jaho maje zarehistravać Ministerstva ekanomiki. Pra atrymańnie dazvołu i rehistracyju pakul nie paviedamlałasia.
Pavodle źviestak rasiejskich ŚMI, chołdynh maje ŭznačalić dyrektar rasfarmavanaha departamentu Valer Šaŭčuk, ale takoje rašeńnie nie publikavałasia.
KDK tym časam aktyŭna zajmajecca źnižeńniem sabiekoštu kamunalnych pasłuhaŭ i aburajecca tym, što hetym zajmajecca nie adpaviednaje ministerstva.
