Rasiejski apazycyjny palityk Uładzimier Jahoraŭ, jaki sprabavaŭ schavacca ad pieraśledu na terytoryi Biełarusi, źnik 29 lipienia, i dahetul jahonaje miescaznachodžańnie nieviadomaje.
Supracoŭniki biełaruskaha chostełu, u jakim žyŭ Uładzimier Jahoraŭ, paviedamili pravaabaroncam, što za im pryjšli «kamitetčyki». «Heta padobna da spravy Murada Amryjeva», — kaža biełaruskaja pravaabaronca Nasta Łojka.
Uładzimier Jahoraŭ, aktyvist «Jabłoka», padčas adzinočnaha pikietu ŭ horadzie Tarapiec.
Suprać Jahorava, jaki žyvie ŭ horadzie Tarapiec Ćviarskoj vobłaści Rasiei i ŭznačalvaŭ miascovaje adździaleńnie partyi «Jabłoko», była raspačataja kryminalnaja sprava za post «ekstremisckaj skiravanaści» u sacyjalnaj sietcy.
«U Rasiei ciapier chvala zaviadzieńnia kryminalnych spraŭ za reposty, jakija nibyta ŭtrymlivajuć ekstremizm, — apaviadaje pravaabaronca arhanizacyi Human Constanta Nasta Łojka. — Šmat aktyvistaŭ trapili pad jaje. Suprać Uładzimiera Jahorava, jaki zajmaŭsia raśśledavańniem karupcyjnych spraŭ, było šmat sprobaŭ pieraśledu ŭ roznych formach. U jaho dva razy sprabavali padpalić dom, sačyli za jahonymi pastami ŭ sacsietkach. I voś adzin z pastoŭ adnieśli da «ekstremizmu», zaviali kryminalnuju spravu».
Ad pieraśledu palityk sprabavaŭ schavacca va Ŭkrainie, dzie paprasiŭ statusu ŭciekača. Adnak nibyta supracoŭniki SBU vyvieźli jaho na neŭtralnuju pałasu pamiž punktami propusku Siańkoŭka (Ukraina), Novyja Jurkavičy (Rasieja) i Viesiałoŭka (Biełaruś).
«Mianie, papraŭdzie, našmat bolš turbuje toje, što ź im adbyłosia ŭ Biełarusi, — kaža Nasta Łojka. — Supracoŭniki chostełu, u jakim žyŭ Jahoraŭ, paviedamili pravaabaroncam, što za im pryjšli «kamitetčyki» i paśla hetaha jon źnik. Pavodle infarmacyi pravaabaroncaŭ, 31 lipienia Ŭładzimiera Jahorava asudzili ŭ sudzie Kastryčnickaha rajonu Miensku za «chulihanstva» na dvoje sutak. Asudzili jaho nibyta ŭ jahonuju adsutnaść, vyznačyć jahonaje ciapierašniaje miescaznachodžańnie taksama nie ŭdajecca».
«Ja, kaniečnie, bačyła roznaje. Jak ludziej u chutkim režymie sudzili i na roŭnym miescy davali pa 15 sutak za što zaŭhodna. Ale takoha, što čałavieka sudziać u jahonuju adsutnaść, jon fizyčna nidzie nie źjaŭlajecca, jaho niama ani ŭ jakich izalatarach i ŭsie dziaržaŭnyja orhany adchryščvajucca i kažuć, što ŭ nas takoha niama, z takim ja sutykajusia ŭpieršyniu».
Nasta Łojka kaža, što pavodle mihracyjnaha zakanadaŭstva Jahoraŭ moh znachodzicca ŭ Biełarusi biez rehistracyi da 90 dzion. Navat kali b biełaruskija ŭłady vyrašyli pravieści praceduru vysyłki, to Departament pa hramadzianstvie i mihracyi musić heta paćvierdzić.
«Tut ža ani rajonny AHIM, ani pres-słužba MUSu nie paćvierdzili, što takoje rašeńnie było. I niezrazumieła, dzie jon zaraz znachodzicca. Niezrazumieła, čamu sud adbyŭsia bieź jaho. Ja ŭpeŭnienaja, što hety sud pa nadumanaj pryčynie i nie źviazany z łajankaj i čymści padobnym», — kaža Łojka.
Pavodle jaje, u Biełarusi Jahoraŭ čakaŭ aficyjnaha paćvierdžańnia ad pamiežnych słužbaŭ Ukrainy pra svoj status. U vypadku, kali jamu ŭjezd va Ŭkrainu jamu nie zabaronieny aficyjna, jon mierkavaŭ vyjechać tudy.
«Ale biełaruskija ŭłady, jak zaŭždy, usich pierajhrali, i ja vielmi chvalujusia za jahony los. Jość vialikaja vierahodnaść, što jon niekalki hadoŭ moža pravieści ŭ rasiejskaj turmie prosta na roŭnym miescy», — kaža Nasta Łojka.
«Dla mianie samaje strašnaje, što my jaho fizyčna nie znajšli. Strašna ŭjavić, što ź im zaraz moža adbyvacca i dzie jon ciapier. Bo jahonamu rasiejskamu advakatu ŭ vypadku jaho znachodžańnia ŭ Rasiei pavinnny byli paviedamić pra heta. Ale hetaha nie adbyłosia jašče», — kaža pravaabaronca.
Nasta Łojka śćviardžaje, što sytuacyja z Ŭładzimieram Jahoravym vielmi padobnaja da spravy Murada Amryjeva.
«Tam vielmi padobnaja sytuacyja była, kali ŭ Dobrušy było mała infarmacyi, nie puskali da jaho advakata, ihnaravali status uciekača, nie tłumačyli, što za pracedura. Tolki ŭ vyniku našych nastojlivych zapytaŭ my daviedalisia, što heta pracedura vysyłki, — tłumačyć Nasta Łojka. — I ja nie vyklučaju, što ŭ sytuacyi Jahorava praź niejki čas taksama paviedamiać pra praceduru vysyłki».
Uciakač z Čačni Murad Amryjeŭ byŭ zatrymany 7 červienia ŭ 17:24 u punkcie propusku «Viesiałoŭka» Homielskaj pamiežnaj hrupy na vyjeździe ź Biełarusi va Ŭkrainu. Jon byŭ vysłany ź Biełarusi pad kanvojem 9 červienia na pradpisańnie Hienprakuratury. Pavodle rasiejskich ŚMI, biełaruskija struktury «nie atrymlivali» prašeńnia Amryjeva ab palityčnym prytułku, jakoje Amryjeŭ pisaŭ u dzień zatrymańnia. U Hienprakuratury Biełarusi zajavili, što pieradača zatrymanaha 9 červienia nia jość ekstradycyjaj: pieradačaj zajmalisia orhany ŭnutranych spraŭ.
Kamientary