Navukoŭcy ŭpieršyniu vydalili z DNK čałaviečaha embryjona hien, adkazny za chvarobu
U ZŠA hrupa navukoŭcaŭ z amierykanskich i paŭdniovakarejskich instytutaŭ paśpiachova vydaliła z DNK čałaviečaha embryjona hien z mutacyjaj, jaki adkazvaje za raźvićcio zachvorvańnia. Daśledavańnie było apublikavana ŭ časopisie Nature.
Navukoŭcam udałosia z dapamohaj instrumienta redahavańnia hienomu CRISPR-Cas9 vyrazać hien z mutacyjaj, jakaja vyklikaje hipiertrafičnuju kardyamiapatyju — zachvorvańnie serca, jakoje sustrakajecca ŭ adnaho z 500 čałaviek i moža stać pryčynaj raptoŭnaj śmierci.
Ekśpierymient udaŭsia ŭ 42 vypadkach z 58, heta značyć, u 72 pracentach vypadkaŭ. Embryjony byli źniščanyja paśla piaci sutak raźvićcia.
Padčas ekśpierymientu navukoŭcy apładnili śpiermaj mužčyny, u hienach jakoha jość adpaviednaja mutacyja, jajkakletki 12 zdarovych žančyn. Adnačasova jany ŭvodzili ŭ jajkakletki CRISPR-Cas9, jaki vyrazaŭ z mužčynskaj DNK mutavany hien.
Jak piša The New York Times, navukoŭcy ŭviali ŭ jajkakletku materyjał dla «ramontu» DNK z dapamohaj štučna stvoranaha zdarovaha hiena, adnak embryjony vykarystoŭvali zamiest jaho zdarovy hien z maciarynskaj DNK.
Heta aznačaje, što mianiać hieny čałavieka z dapamohaj CRISPR-Cas9 i stvarać «dyzajnierskich» dziaciej (z vyznačanym koleram vačej, fihuraj i hetak dalej) značna składaniej, čym ličyłasia da hetaha daśledavańnia.
Navukoŭcy śćviardžajuć, što nie zafiksavali nijakich niepažadanych źmien DNK. Takija źmieny adbylisia ŭ anałahičnych ekśpierymientach, raniej praviedzienych u Kitai.
Redahavańnie hienaŭ embryjonaŭ vyklikaje dyskusii z-za etyčnych mierkavańniaŭ. Krytyki vykazvajuć aściarohi ŭ suviazi z mahčymaściu stvareńnia «dyzajnierskich» dziaciej, a taksama pakazvajuć, što lubyja źmieny (u tym liku niezapłanavanyja) u čałavieku z adredahavanym hienomam buduć pieraniatyja jaho naščadkami.
U ZŠA dziejničajuć strohija abmiežavańni na padobnyja daśledavańni; sproby redahavać hieny, jakija adkazvajuć za raźvićcio zachvorvańniaŭ, rabilisia ŭ Kitai, ale nie byli pryznanyja ŭdałymi.
Praviadzieńnie kliničnych daśledavańniaŭ z padsadžvańniem embryjonaŭ z adredahavanaj DNK u matku žančyny niemahčyma na terytoryi ZŠA i «technałohija sydzie ŭ mienš zarehulavanyja krainy».
Ciapier čytajuć
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža29
Kamientary