Samy ŭdały aŭtapark krainy — Baranavicki — raskazaŭ pra sakrety pośpiechu
Hramadskija pieravozki ŭ Biełarusi — adnaja z asnovaŭ toj «sacyjalnaj dziaržavy», pra jakuju kaža prezident.
Dziaržaŭnyja pieravozčyki isnujuć va ŭmovach, pryvabnych dla klijenta — košty na pierajezd u nas chiba nie najnižejšyja ŭ Jeŭropie, ale sami aŭtaparki navat prybytku nie mohuć mieć: ich paśpiachovać vymiarajecca ŭ pracentach kampiensacyi vydatkaŭ, u zdolnaści minimizavać vydatki biudžetu na ich rabotu.
I voś u hetym lidar u krainie — Baranavicki aŭtapark.
U horadzie z nasielnictvam pad 180 tysiač čałaviek aŭtapark kampiensuje, byvaje, i pa 92% vydatkaŭ na miesiac. Kiroŭcy tut mohuć zarablać i bolš, čym słavutyja $500 — i heta ŭ rajonnym centry.
U horadzie maršrutki majuć tolki 1% ad rynku pieravozak — tak naładžany trafik dziaržaŭnych aŭtobusaŭ, što pryvatniki nie mohuć pryciahnuć klijentaŭ.
Dyk u čym sakret pośpiechu Baranavičaŭ?
«Naša Niva» pahutaryła ź mieniedžarami aŭtaparka. «Usia sprava ŭ efiektyŭnym kiravańni, a efiektyŭnaje kiravańnie siońnia — heta nie tolki čałaviek, heta ŭ vialikaj stupieni i elektronnyja technałohii», — davodziać tyja..
«Vy pytajecie, u čym sakret pośpiechu? — kaža namieśnik dyrektara Siarhiej Palij. — Rabota aŭtaparka šmatbakovaja, treba ŭsačyć za pieravozkami pa horadzie, pryharadzie, za stanam techniki, za kiroŭcami, kantralorami, turystami… Što tut kazać. Pracajomka było ŭsio heta «vieści», pakul my nie zadalisia metaj aŭtamatyzavać kantrol — zakupili sabie prahramu «Miehapłan».
«Miehapłan» — heta svojeasablivy simbijoz štodziońnika i sacyjalnaj sietki ŭnutry asobna ŭziataha kalektyvu.
Prahrama dazvalaje stavić zadačy padnačalenym, sačyć za vykanańniem, a tym — spravazdačycca. «Kiraŭnik krainy patrabuje, kab my ŭkaraniali novyja technałohii. I my pajšli pa hetaj darozie. Voś ja staŭlu zadaču svaim rabočym, — demanstruje mahčymaści prahramy Siarhiej Palij. — U jaho ŭ hety momant vyskokvaje paviedamleńnie na rabočym kampjutary, i prychodzić list na telefon. Tam adrazu ja mahu prapisać, što mnie treba, kali treba, termin vykanańnia. Chod raboty ja baču ŭ žyvym efiry, možna skazać. Viedajecie, jak u kiraŭnika hałava zabitaja, a tut prychodziš, komp uklučaješ — adrazu bačyš usio, što daručaŭ. Bačyš, chto fiłonić, a chto nie».
Davodzicca prasić namieśnika dyrektara spynicca, ale toj praciahvaje.
«Nie možam naciešycca. Nakolki ja viedaju, tolki my pakul takim karystajemsia. Tut usio, razumiejecie? Niejkija ŭnutranyja narmatyŭnyja akty vyjšli — tut usia baza! Treba naradu sabrać? Adznačyŭ patrebnych ludziej, paznačyŭ čas, miesca — usie sabralisia. Nie treba zvanić nikomu, nie treba nikoha pasyłać. Kali ŭ kahości nie vychodzić — nie treba ŭsich abzvońvać pra pieranos. Času aščadžajecca proćma. U nas uvieś inžynierny skład na prahramie hetaj, kiraŭniki… 66 čałaviek ahułam. Heta my prykinuli — na adnaho čałavieka vydatkavali pa 50 rubloŭ, a vychłapu šmatkroć».
«Dakumienty taksama karektujucca ŭ prahramie — nie treba ciapier biehać pa kabinietach, kab uzhadnić niejki akt ci zadaču, nie treba ŭ trubku kryčać načalniku jakoha cecha — u jaho tam usio hrymić, šumić — lepš jon sam usio pračytaje. Usia sistema zabieśpiačeńnia, turystyčnyja maršruty, zamovy, rachunki — usio znachodzicca na ŭliku ŭ «Miehapłanie», — kaža Palij.
Ale toje — nie adzinyja navatarstvy. Tak, navat prapusknaja sistema ŭ Baranavickim aŭtaparku elektronnaja — možna ŭbačyć, chto kali syšoŭ z raboty i kali na jaje pryjšoŭ.
Svaje płany kiroŭcy taksama daŭno nie bačać na papiery — u zale aŭtaparka jość admysłovaje tabło, kudy kiroŭca prykładvaje svoj čyp, a na ekran vyvodziacca ŭsie jahonyja pakazčyki.
A prablemy ŭ aŭtaparka typovyja — nie nadta achvočyja da apłaty prajezdu pasažyry.
«Niekatoryja dumajuć tak: heta nas aŭtobusy pavinny vazić, a nie my płacić. A pavinien być parytet. Tamu my i tut lepšyja pa krainie — u nas achop maršrutaŭ kantralorami — 35%. Možacie sami spytać u haradžan, ci nie bajacca jany ciapier jeździć zajcami», — žartujuć u aŭtaparku i rajać svaim kaleham ź inšym haradoŭ pierajmać baranavicki dośvied.
Ciapier čytajuć
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža29
Kamientary