Infarmacyju pra zdareńnie baranavickamu partału Intex-press paviedamiŭ čytač Valeryj Hoŭša. Kala 17 hadzin 2 žniŭnia razam z žonkaj i dziciem jon vyjazdžaŭ z aŭtazapraŭki na vulicy Vilčkoŭskaha.
Miesca zdareńnia — AZS na vulicy Vilčkoŭskaha ŭ Baranavičach. Fota: Natalla Siemianovič
Niečakana z krykami «Dapamažycie, zabivajuć!» z-pad mosta da ich padbiehła skryvaŭlenaja dziaŭčyna i zaskočyła ŭ mašynu.
— Jana była ŭsia ŭ kryvi, byccam na jaje vylili viadro kryvi. Dva zuby złamanyja, niešta było z palcam — ja nie zrazumieŭ, ci to ŭ jaje paznohać zrezany, ci to palec. Jana była ŭ šoku, vielmi dziŭna havaryła. My navat padumali, što jana vypiła abo, moža, adniekul zvaliłasia, — raspaviadaje žonka Valeryja, jakaja taksama była ŭ mašynie.
Dziaŭčynie vyklikali chutkuju dapamohu. Pa słovach Valeryja, užo praz paru chvilin miedyki padaśpieli.
Da pryjezdu miedykaŭ i milicyi dziaŭčynka raspaviała, što joj 15 hadoŭ. Jana adpačyvała na Myšancy ź siabroŭkami, ale dadomu pajšła adna. Jana išła ŭzdoŭž darohi, kali pobač ź joj spyniŭsia aŭtamabil. Ź jaho vyjšaŭ mužčyna i spytaŭ, ci nie bačyła jana sabačku. Jana adkazała, što nie bačyła. Tady jon napaŭ na jaje i zaciahnuŭ u mašynu. Pa słovach Valeryja, biŭ jon čymści mietaličnym, mahčyma, haječnym klučom.
U mašynie vykradalnika dziaŭčyna pryjšła ŭ siabie. Pad mostam na vulicy Vilčkoŭskaha ruch arhanizavany tak, što prajechać moža tolki adna mašyna. Takim čynam, złačyniec vymušany byŭ skinuć chutkaść. Mahčyma, mienavita hetym dziaŭčynka skarystałasia, kab vyskačyć z aŭtamabila.
Haradžanin Jaŭhien raspavioŭ Intex-press, što jon jechaŭ z Zornaha pa kirunku ŭ Baranavičy, kali staŭ vypadkovym śviedkam taho, jak dziaŭčynka vyskačyła z mašyny vykradalnika.
— Ja jedu, baču, miniven, byccam by Citroen. Ja źviarnuŭ na jaho ŭvahu tamu, što zadnija pravyja dźviercy, jakaja bližej da abočyny, byli ŭ jaho adkryty. My prajechali mima adzin adnaho, i ja pahladzieŭ u lusterka zadniaha vidu — dziŭna, praŭda, što mašyna jedzie z adkrytymi dźviaryma. I raptam z hetych dźviarej vypadaje dziaŭčyna, padymajecca i pačynaje biehčy ŭ bok AZS. Kiroŭca Citroen spyniŭsia, vyjšaŭ z mašyny, staŭ machać rukami i niešta joj kryčać, ale za joj nie bieh. Ja nie viedaju, kolki jamu było hadoŭ. Zdajecca, jon byŭ łysavaty. Dziaŭčyna stała biehčy praz darohu, jaje jašče bus ledź nie źbiŭ. Ale kali jana była ŭžo la AZS, stali spyniacca mašyny. Ja vyrašyŭ, što joj dapamohuć, i pajechaŭ dalej, — kaža Jaŭhien.
Što rabiŭ dalej kiroŭca Citroen, Jaŭhien nie bačyŭ.
Pavodle nieaficyjnaj infarmacyi, padazravany zatrymany. Jamu kala 40 hadoŭ. Kamientar u pravaachoŭnych orhanaŭ atrymać pakul nie ŭdałosia.
