U piatnicu ŭ sudzie Centralnaha rajona pačalisia sprečki ŭ pracesie top-mieniedžaraŭ Biełarusbanka, byłoha pieršaha namieśnika staršyni praŭleńnia Biełarusbanka Hienadzia Haspadaryka i načalnika ŭpraŭleńnia Mikałaja Cyrto. Pieršy abvinavačvajecca ŭ atrymańni chabaru i ŭ złoŭžyvańni słužbovymi paŭnamoctvami (pa hetym artykule abvinavačany svaju vinu nie pryznaje), Cyrto abvinavačvajuć taksama ŭ dačy chabaru i padbuchtorvańni da jaje.
Dziaržabvinavaŭca Juryj Šarśnioŭ adznačyŭ, što karupcyjnyja złačynstvy, ździajśnianyja vysokimi słužbovymi asobami, nanosiać škodu intaresam dziaržavy i zaprasiŭ dla Haspadaryka 7 hadoŭ 6 miesiacaŭ uzmocnienaha režymu z kanfiskacyjaj, dla Cyrto — u sukupnaści 9 hadoŭ z kanfiskacyjaj.
Šarśnioŭ nahadaŭ, što i sam Haspadaryk pryznaŭ vinu ŭ atrymańni chabaru i dobraachvotna vydaŭ ablihacyi, nabytyja na atrymanyja srodki. Cyrto vinu pryznaŭ častkova, pry hetym adznačyŭšy, što, da prykładu, chabar ad biznesoŭca Alaksandra Bučnieva nia vymahaŭ.
Kampanija Bučnieva pry hetym zakuplała padlikovyja mašyny prykładna ŭdvaja tańniej, čym pradavała ich Biełarusbanku, što davała mahčymaść davać takija bujnyja chabaru, adznačyŭ dziaržabvinavaŭca.
Mikałaj Cyrto, fota Siarhieja Hudzilina
Nahadajem, što raniej u sudzie davali pakazańni supracoŭniki Biełarusbanka i pastaŭščyki. Taksama byli zasłuchany pakazańni hałoŭnaha śviedki i pa sumiaščalnictvie «chabaradavalnika» Alaksandra Bučnieva. Usiaho ŭ śpisie śviedak - 46 čałaviek, materyjały spravy składajuć bolš za 10 tamoŭ.
Były pieršy namieśnik staršyni praŭleńnia Biełarusbanka Hienadź Haspadaryk, zatrymany ŭ červieni minułaha hoda, abvinavačvajecca ŭ ździajśnieńni złačynstvaŭ, praduhledžanych č. 2 i č. 3 art. 430 ( «Atrymańnie chabaru albo ŭ asabliva bujnym pamiery, albo arhanizavanaj hrupaj, albo asobaj, jakaja zajmaje adkaznaje stanovišča», maksimalnyja sankcyi pa hetym artykule - ad piaci da piatnaccaci hadoŭ z kanfiskacyjaj majomaści), a taksama ŭ złoŭžyvańni słužbovymi paŭnamoctvami (č. 2 i 3 art. 424). Pa dadzienych śledstva, Haspadaryk u 2010-2015 hadach atrymaŭ chabaru na sumu bolš za 215 tysiač dalaraŭ. Adkaty byli ad niekalkich kampanij (u spravie pa bolšaści epizodaŭ fihuruje ich pradstaŭnik Bučnieŭ) za pieramohu ŭ tendarach na pastaŭku bankaŭskaha abstalavańnia. Pa ŭsich siami epizodach, źviazanych z atrymańniem chabaru, abvinavačany pryznaŭ svaju vinu. Abvinavačvańni ŭ złoŭžyvańni słužbovymi paŭnamoctvami Haspadaryk nie pryznaŭ.
Načalnik upraŭleńnia Mikałaj Cyrto padazrajecca ŭ ździajśnieńni tych ža złačynstvaŭ, što i Haspadaryk, a taksama ŭ dačy chabaru (č. 2 art. 431), padbuchtorvańni da dačy chabaru (č. 5 art. 16 i č. 2 art. 431). Suma atrymanych chabaraŭ - kala 500 tysiač dołaraŭ. Mikałaj Cyrto zajaviŭ, što svajo staŭleńnie da abvinavačvańniaŭ jon vykaža ŭ chodzie dopytu.
Pavodle infarmacyi KDB, Hienadź Haspadaryk byŭ zatrymany ŭ siaredzinie červienia ŭ momant atrymańnia chabaru ŭ pamiery 14 tysiač dalaraŭ. Paźniej kiraŭnik KDB Valeryj Vakulčyk zajaviŭ, što realnyja sumy, atrymanyja top-mieniedžaram Biełarusbanka ŭ jakaści chabaru, «našmat bolš».
KDB aktyŭna viarbuje palitviaźniaŭ, vyzvalenych pa pamiłavańni — pravaabaroncy3
Kamientary