Kiraŭnica Administracyi prezidenta raskazała, jakuju knihu čytaje ŭsio žyćcio

Kiraŭnica Administracyi prezidenta Biełarusi Natalla Kačanava u intervju časopisu «Alesia» adkazała na pytańni pra siamju, lubimy zaniatak i staŭleńni da sportu, paviedamlaje BiełTA.

«Ja na surjoznych pasadach z taho času, kali małodšaja dačka jašče ŭ škołu nie chadziła. Zaŭsiody, kali mnie prapanoŭvali čarhovuju pracu, raiłasia z mužam. Jon ni razu nie skazaŭ «nie», - padzialiłasia Natalla Kačanava.

Jana pryznałasia, što ličyć svaju siamju vielmi družnaj: niahledziačy na toje što členy siamji žyvuć u roznych miescach, sustrakajucca pry pieršaj mahčymaści. Naprykład, rodny brat Natalli Kačanavaj, jaki ŭžo šmat hadoŭ žyvie ŭ Krasnadary, kožny hod pryjazdžaje ŭ Połack, kab pravieści adpačynak. Sama kiraŭnik Administracyi taksama starajecca pry luboj mahčymaści vyrvacca ŭ rodny horad, dzie žyvuć jaje dačka, unučka i baćki.

U intervju Natalla Kačanava raspaviała, čym lubić zajmacca ŭ volny čas. Doma pierad snom jana abaviazkova znachodzić čas dla čytańnia. «Heta maja luboŭ ź dziacinstva. Tady byli Dykiens, ruskaja kłasika, jakuju potym pieračytvała ŭžo ŭ inšyja žyćciovyja pieryjady. Samym składanym pytańniem pry pierajeździe ŭ Minsk była prablema biblijateki. Jana ŭ nas supolnaja sa starejšaj dačkoj. Jana takaja ž, jak i ja: čytaje, kuplaje knihi. Tak što tolki častku pieraviezła z saboj», — zaŭvažyła jana.

Lubimaj knihaj, pa słovach kiraŭnika Administracyi prezidenta, dla jaje była i zastajecca «Jak vychavać sapraŭdnaha čałavieka» Vasila Suchamlinskaha. «Ja jaje ŭzachlob čytała jašče ŭ škole. A ciapier pryviezła ŭ Minsk, kab unukam čytać. Tam vielmi dachodliva tłumačycca, jak stavicca da mamy, radzimy, siamji», — ličyć jana.

Što tyčycca sportu i zdarovaha ładu žyćcia, Natalla Kačanava źviarnuła ŭvahu, što kožnuju ranicu robić zaradku, dla čaho ŭ jaje jość ceły kompleks praktykavańniaŭ. Zaradku imkniecca nie prapuskać, chiba što ŭ kamandziroŭcy. «U maim savieckim dziacinstvie sport byŭ dadzienaściu. Treniery chadzili pa škołach, zaprašali dziaciej u siekcyi. Ja była chudzieńkaja, mianie ŭ druhim kłasie paklikali zajmacca lohkaj atletykaj: bieh z barjerami. A ŭ piatym kłasie ja pajšła na valejboł», — dadała kiraŭnik Administracyi prezidenta.

Pavodle jaje słoŭ, sport — heta taja častka žyćcia, jakaja padaryła nie tolki siabroŭ, ale i kachanaha čałavieka. Sa svaim budučym mužam Natalla Kačanava paznajomiłasia na spabornictvach.

• 0
• 0
• 0
• 0
• 0
• 0
• 0
• 0