Minharvykankam unios prapanovu ŭ Ministerstva antymanapolnaha rehulavańnia i handlu (MARH) ab uzmacnieńni žorstkaści adkaznaści fizičnych asob za niesankcyjanavany handal. Pra heta, jak pieradajuć «Minsk-Naviny», paviedamiŭ 6 vieraśnia staršynia Minharvykankama Andrej Šorac padčas pres-kanfierencyi ŭ ratušy.
«Pavodle isnujučaha zakanadaŭstva, sanitarna-epidemijałahičnaja słužba nie moža ŭžyvać da fizičnych asob niejkija miery ŭździejańnia za handal pradukcyjaj sumniŭnaj jakaści, naprykład, u vypadku, kali hramadzianin handluje sałam na vulicy ŭ 30-hradusnuju śpiakotu, — rastłumačyŭ Šorac. — Spadziajusia, što źmieny ŭ zakanadaŭstva buduć uniesienyja, i tady nie tolki adździeły handlu i pasłuh rajonnych administracyj i milicyja, ale i sanepidsłužba zmoža ŭžyvać da nielehalnych handlaroŭ bolš efiektyŭnyja miery ŭździejańnia».
Kiraŭnik harvykankama adznačyŭ, što ŭ horadzie stvarajucca handlovyja šerahi, na bujnych rynkach jość miescy, dzie možna realizoŭvać pradukcyju sa svajho prysiadzibnaha ŭčastka praktyčna biaspłatna. Tym nie mienš mnohija hramadzianie addajuć pieravahu handlu ŭ nieprydatnych dla hetaha miescach.
«Nie skažu, što ŭ Minsku siońnia idealny handal, — reziumavaŭ Šorac. — Jość i dobryja kramy z šyrokim asartymientam pradukcyi, vysokaj jakaściu absłuhoŭvańnia, hnutkaj cenavaj palitykaj, i handlovyja abjekty, jakija jašče treba padciahvać da staličnaha ŭzroŭniu».
