U Biełarusi płanujecca zabaranić prodaž ałkaholu paśla 23.00 u kramach i na AZS. Pra heta siońnia žurnalistam paviedamiŭ načalnik upraŭleńnia prafiłaktyki MUS Aleh Karaziej, pieradaje BIEŁTA.
U MUS ličać, što ŭ krainie nieabchodna ŭvieści strohija miery ŭ śfiery abarotu ałkaholu. Razmova, u pieršuju čarhu, idzie ab abmiežavańni času prodažu ałkaholu ŭ roźnicu.
«U ideale, jak heta zroblena ŭ mnohich krainach, možna havaryć ab dziesiaci hadzinach viečara. Ale paśla abmierkavańnia z zacikaŭlenymi viedamstvami, u pryvatnaści z MARH, pryjšli da vysnovy, kab spačatku chacia b paśla 23.00 pierastać pradavać ałkahol u roźnicu», — skazaŭ Aleh Karaziej.
Pavodle jaho słoŭ, pravilna było b heta zrabić nie tolki ŭ kramach, ale i na aŭtazapravačnych stancyjach. Tyja, chto nie paśpieŭ nabyć śpirtnoje ŭ kramach, niaredka nakiroŭvajucca za im na AZS, u tym liku i znachodziačysia za rulom.
U Biełarusi apošnija niekalki hadoŭ źnižajecca kolkaść złačynstvaŭ, učynienych pad upłyvam ałkaholu. Heta abumoŭlena ŭ tym liku mierami, jakija prymajuć usie zacikaŭlenyja dziaržaŭnyja orhany dla baraćby z pjanstvam. Razam z tym pravaachoŭniki adznačajuć, što 80% zabojstvaŭ, razbojaŭ i hrabiažoŭ, vypadkaŭ naniasieńnia ciažkich cialesnych paškodžańniaŭ učyniajecca ludźmi ŭ stanie ałkaholnaha apjanieńnia.
«Bolšaść hetych pravaparušeńniaŭ nie było b učynienaja, kali b ludzi nie znachodzilisia pad upłyvam ałkaholu», — zaŭvažyŭ načalnik upraŭleńnia prafiłaktyki MUS. Tamu MUS stavić pytańnie ab tym, što treba i dalej prymać miery pa baraćbie z pjanstvam i ałkahalizmam, nie spyniajučysia na dasiahnutym.
Aleh Karaziej raskazaŭ, jakija dziejańni ŭ hetaj halinie prymajucca z boku orhanaŭ unutranych spraŭ. Heta vyjaŭleńnie ałkaholu, jaki znachodzicca ŭ abarocie nielehalna, vyjaŭleńnie hramadzian u stanie mocnaha ałkaholnaha apjanieńnia ŭ hramadskich miescach (za heta praduhledžana administracyjnaja adkaznaść). «U MUS bačać vynik svajoj raboty. Ale ličym, što treba zrabić bolš, pryniać miery, jakija ŭ cełym paŭpłyvajuć na situacyju z užyvańniem ałkaholu ŭ Biełarusi», — reziumavaŭ pradstaŭnik MUS.
