Stała viadoma, kaho bukmiekiery ličać favarytami na Nobieleŭskija premii
Najbujniejšyja bukmiekierskija kantory śvietu adkryli linii na ŭładalnikaŭ sioletniaj Nobieleŭskaj premii, jakaja budzie prysudžanaja praz try tydni, u kastryčniku.
Jaki ŭžo hod zapar biezumoŭnym favarytam na atrymańnie Nobiela pa litaratury zastajecca japonski piśmieńnik Charuki Murakami. U Murakami šmat i prychilnikaŭ, i chiejteraŭ. Apošnija kažuć, što dać premiju japoncu budzie kiepskim hustam. Maŭlaŭ, zanadta prosta i zabaŭlalna jon piša. Daduć Murakami, a tady što, Paoło Kaelju na čarzie? Siarod tych, chto pieražyvaje za japonca, naprykład, Śviatłana Aleksijevič. Jana ličyć, što ŭ tvorčaści Murakami prysutničaje «ŭschodniaja aranžyroŭka padziej i ich razumieńnie». Murakami adnaznačna samy čytany siarod pretendentaŭ na Nobiela. Staŭki na Murakami prymajucca z kaeficyjentam 1 da 1,5.
Druhim idzie kienijec Nhuhi Va Tchijonha. Jon taksama nie pieršy hod siarod tych, chto voś-voś pavinien atrymać Nobiela. Piśmieńniki z Afryki atrymlivali premiju ŭ 2003 (Džon Kutzee) i 1991 (Nadzin Hordzimier). A voś apošnim čarnaskurym afrykanskim piśmieńnikam, chto atrymlivaŭ samuju prestyžnuju premiju ŭ litaratury, byŭ Vole Šojinka ź Nihieryi ŭ 1986 hodzie. Takim čynam, minuła ŭžo bolš za tryccać hadoŭ. Tchijonha budzie nastupnym? Jahonyja šancy aceńvajucca jak 1 da 5.
Na trecim miescy kanadka Marharet Etvud. Apošnija hady jana prysutničała ŭ padobnych śpisach, ale nie na samych vysokich pazicyjach. Mahčyma, tamu što zusim niadaŭna Nobiela ŭžo atrymlivała inšaja kanadka — Elis Manro. Darečy, kniha Etvud «Pieniełapijada» była pierakładzienaja na biełaruskuju movu Volhaj Kałackaj. Na jaje prymajucca hrošy z raźlikam 1 da 6.
Biełarusaŭ u śpisie niama. Z susiedziaŭ prysutničaje tolki polski paet Adam Zahajeŭski (1 da 50). Ukraincaŭ i rasijan taksama nie razhladajuć jak realnych pretendentaŭ na ŭznaharodu.
Taksama pačali prymać staŭki i na Nobieleŭskuju premiju miru. Jaje pradrakajuć Amierykanskamu sajuzu hramadzianskich svabodaŭ. Hetaja arhanizacyja zabiaśpiečvaje jurydyčnuju dapamohu ŭ sudovych pracesach, jakija, na dumku ACLU, mohuć pryvieści da pryciaśnieńnia hramadzianskich svabod. Mnohija pracesy, u jakich udzielničali pradstaŭniki ACLU, pryviali da źmienaŭ u kanstytucyjnym pravie ZŠA. Na ich pieramohu dajecca kaeficyjent 1 da 3.
Na druhim i trecim miescy papa rymski Francišak i vałanciorskaja arhanizacyja «Biełyja kaski», jakaja dziejničaje na terytoryi Siryi i Turcyi. Ich šancy aceńvajucca jak 1 da 4.
«Heta pytańnie času, ale treba saśpieć». Pucin zahavaryŭ pra adziny parłamient i valutu Biełarusi i Rasii7
«Heta pytańnie času, ale treba saśpieć». Pucin zahavaryŭ pra adziny parłamient i valutu Biełarusi i Rasii
Biełaruskija biznesmieny śpiešna pradajuć doli ŭ svaich polskich transpartnych kampanijach. Što adbyvajecca?2
Kamientary