Pra heta paviedamiŭ padčas štodzionnaha bryfinhu pradstaŭnik Ministerstva abarony Biełarusi Uładzimir Makaraŭ.
«Na palihonach «Barysaŭski» i «Asipovicki» padraździaleńni voinskich čaściej 1-j tankavaj armii Uzbrojenych Sił Rasii sumiesna z padraździaleńniami voinskich čaściej Paŭnočna-zachodniaha apieratyŭnaha kamandavańnia Biełarusi, zaniaŭšy abarončyja rubiažy, ažyćciaŭlali mierapryjemstvy niepasrednaj padrychtoŭki da bajavych dziejańniaŭ. Praviedzienyja taksama rozyhryšy pa pošuku, vyjaŭleńni i źniščeńni dyviersijnych raźviedvalnych hrup umoŭnaha praciŭnika i niezakonnych uzbrojenych farmavańniaŭ u rajonach adkaznaści», — skazaŭ Makaraŭ.
U pieršy dzień vučeńniaŭ, 14 vieraśnia, Ministerstva abarony RF paviedamiła, što asabovy skład złučeńnia 1-aj hvardziejskaj tankavaj armii, dysłakavanaj u Padmaskoŭi, sa štatnym uzbrajeńniem i technikaj ździejśniŭ marš na čyhunačnuju stancyju, paśla čaho voinskim ešałonam na praciahu sutak budzie pierakinuty ŭ rajon praviadzieńnia vučeńniaŭ na terytoryju Biełarusi.
Ministerstva abarony Biełarusi infarmacyju pra pierakidańnie cełaj tankavaj armii ŭ našu krainu abvierhła. Na pamiežnych čyhunačnych stancyjach, kudy śpiešna vyjechali demakratyčnyja aktyvisty i žurnalisty, taksama nie było zaŭvažana pieramiaščeńnia vialikaj hrupoŭki vojskaŭ.
Padčas bryfinhu 16 vieraśnia Makaraŭ znoŭ padkreśliŭ, što na biełaruskich palihonach znachodzicca tolki zahadzia zapłanavanaja kolkaść rasijskich vajskoŭcaŭ — kala troch tysiač.
Vučeńni «Zachad-2017» praciahnucca da 20 vieraśnia.
