Ravarovaja ściežka na Kujbyšava: chacieli jak lepš, a vyjšła jak zaŭsiody? FOTY
Padychodzić da zaviaršeńnia rekanstrukcyja vulicy Kujbyšava. Letam całkam pierakłali asfalt, zamianili liŭnievuju kanalizacyju i ciapier skančajuć układvać novuju plitku na tratuarach.
Adnak pry pašyreńni skryžavańnia vulic Kujbyšava i Kulman była dapuščana pamyłka, jakaja stvaraje niazručnaść piešachodam i asabliva ravarystam. Na pieršy pohlad, pajšli nasustrač apošnim — abstalavali prajezd praź piešachodnyja pierachody na skryžavańni i dadali čyrvonuju pałasu z kraju tratuara. Ale ŭ inšym miescy stvaryli i pieraškodu, bo zrušyli prypynak «Vuł. Kulman» takim čynam, što prajechać možna tolki praź ludziej, jakija čakajuć transpart.
Niejak inakš abminuć prypynak nielha, a ruch viełasipiedystaŭ pa hetaj vulicy dosyć intensiŭny. Pierad i paśla prypynku vydatnyja šyrokija tratuary, dzie miesca chapaje ŭsim.
A miž tym prosta pobač z prypynkam raźmieščany adna z najlepšych kramaŭ viełazapčastak u horadzie, jakaja dadatkova pavialičvaje viełatrafik. Adrazu za prypynkam ciapier apynuŭsia hazon, za jaki niechta adkazvaje, i jaho adrazu ŭ metach abarony ad piešachodaŭ i ravarystaŭ abaranili pałasataj stužkaj.
Ja dadaŭ niekalki fotaŭ, dzie vidać, jak byŭ raźmieščany prypynak raniej i jakim maršrutam prajazdžali mima jaho ravarysty. A taksama zdymki, dzie nahladna bačnyja ciažkaści ŭ prajeździe na rovary hetaha vuzkaha miesca.
U hałavie nie ŭkładvajecca, pra što dumali prajekciroŭščyki i jak pryjšli da takoha niełahičnaha rašeńnia. Pobač hałoŭny praduktovy rynak krainy i napłyŭ pasažyraŭ hramadskaha transpartu byvaje intensiŭnym. Pryčym siarod ich čakana šmat piensijanieraŭ. Prypynak ulapili tudy, kudy zručna było prajekciroŭščykam, ale nie žycharam rajona.
Ci varta było na pustym miescy stvarać taki kanflikt intaresaŭ, ci ŭsio-tki lepš było vyrašyć prablemu jašče na etapie prajektavańnia skryžavańnia?
Ciapier čytajuć
U Kijevie za špijanaž aryštavali biełaruskuju žurnalistku Inu Kardaš. Kažuć, z 2015 hoda jana pracavała na KDB9
Kamientary