Mitrapalit Minski i Zasłaŭski Pavał, Patryjaršy Ekzarch usioj Biełarusi patłumačyŭ, jak jon stavicca da filma «Macilda» i jak da hetaj kinastužki varta stavicca prychadžanam. Pra heta jon raspavioŭ u intervju aficyjnamu partału BPC, piša Tut.by.
«Na siońnia aficyjnaj pazicyi Ruskaj Pravasłaŭnaj Carkvy pa hetym filmie niama, ale mierkavańnie vielmi mnohich ludziej my možam čuć. Hety film jašče nie vyjšaŭ u prakat, a pra jaho ŭžo iduć dyskusii. Ja admysłova prahledzieŭ niekalki videarolikaŭ, jakija siońnia dastupnyja ŭ internecie, i ŭ mianie skłałasia vielmi niepryjemnaje ŭražańnie pra film», — adznačyŭ archipastyr.
Jon taksama adznačyŭ, što asabista jamu niezrazumieła zaduma filma «Macilda».
«Navošta i dla čaho jon stvaraŭsia? A vynik jaho stvareńnia ŭsim vidavočny. Jon padzialiŭ naša hramadstva, pasiejaŭ smutu ŭ sercach mnohich ludziej, vyklikaŭ chvalu abureńnia ŭ tych, dla kaho impieratar Mikałaj Druhi — pakutnik», — skazaŭ mitrapalit Pavieł, adznačyŭšy, što impieratar — śviaty, i pamiać ab im «śviataja dla ŭsich pravasłaŭnych chryścijan».
Pavodle słoŭ mitrapalita Paŭła, asablivuju horyč i abureńnie vyklikaje toje, što pakaz filma płanujuć ažyćciavić vosieńniu 2017 hoda — u hadavinu Kastryčnickaj revalucyi. «Chočacca źviarnucca i spytać u tych, chto stvaraŭ hety film - čym ža my lepš francuzskaha časopisa «Šarl Ebdo», jaki ździekujecca z tych, što doraha ludziam, nad tymi pačućciami, jakija pieražyvajuć ludzi, jakija stracili blizkich u składanych abstavinach? Dy ničym! U nas adbyvajecca kudy bolš sumnaja padzieja — my ździekujemsia sa svajoj historyi. I heta strašna!» — skazaŭ archipastyr.
Jon nahadaŭ, što carkva nie moža zabaranić pakaz filma «Macilda» i ŭ jaje niama takoj ułady. Ale, pa pierakanańni kiraŭnika BPC, kožny čałaviek, «moža hałasavać nahami». «Nijakaj ahresii z boku viernikaŭ nie pavinna być. Prosta nie chadzicie na hety film», — zaklikaŭ viernikaŭ mitrapalit Pavieł.
Nahadajem, što ŭ biełaruskich kinateatrach film budzie demanstravacca z 26 vieraśnia.
Ciapier čytajuć
U Połk Kalinoŭskaha na tydzień pralez milicejski stukač. Ciapier jaho vykryli, i dobra vidać, chto sprabuje abialić ahienta10
Kamientary