U Biełarusi z pačatku hoda atrucilisia hrybami 96 čałaviek

U Biełarusi z pačatku hoda atrucilisia hrybami 96 čałaviek, paviedamiła BIEŁTA zahadčyca adździaleńnia hihijeny charčavańnia Respublikanskaha centra hihijeny, epidemijałohii i hramadskaha zdaroŭja Vija Šukievič.

Pavialičyć

Pa stanie na 20 vieraśnia ŭ respublicy zarehistravany 83 vypadki atručeńnia hrybami, siarod jakich adzin sa śmiarotnym zychodam. Bolš za ŭsio takich vypadkaŭ u Minsku (37) i Mahiloŭskaj vobłaści (14). U Hrodzienskaj vobłaści zarehistravana 5 vypadkaŭ, Bresckaj — 5, Homielskaj — 9, Viciebskaj — 7, Minskaj — 6. Usiaho paciarpieli 96 čałaviek.

Pavodle słoŭ Vii Šukievič, pa svajoj ciažkaści vostryja atručeńni jadavitymi hrybami zajmajuć viadučaje miesca siarod usich niebakteryjalnych charčovych atručeńniaŭ. Mocnadziejnyja jady nie razburajucca pry kulinarnaj apracoŭcy.

Atručeńni hrybami majuć charakternyja prykmiety. Zachvorvańnie pačynajecca praz 3-12 hadzin paśla ŭžyvańnia ich u ježu. Na pačatkovych stadyjach uźnikaje rezki bol u žyvacie, niastrymnaja rvota, panos, słabaść, hałaŭny bol. U dalejšym mohuć dałučacca sutarhi, halucynacyi.

Pryčynaj atručeńnia mohuć stać nie tolki jadavityja pa svajoj pryrodzie, ale i tak zvanyja ŭmoŭna-jadomyja hryby, kali nie źviartać uvahi na asnoŭnyja praviły ich hatavańnia. Da takich adnosiacca niekatoryja vidy syraježak, śvinuchi, vaŭnianki, čarnuški i inš. Vostraje atručeńnie moža nastać i ad užyvańnia jadomych hryboŭ, kali jany doŭha znachodzilisia biez kulinarnaj apracoŭki. Nie redkaść - atručeńni niedavaranymi i syrymi hrybami.

Kab paźbiehnuć zachvorvańnia, nieabchodna vykonvać elemientarnyja praviły prafiłaktyki. Źbirać treba tolki viadomyja hryby (isnujuć śpiecyjalnyja daviedniki). Kali niama ŭpeŭnienaści, što hryb jadomy, lepš jaho zusim nie brać. Padazronyja hryby niedapuščalna sprabavać na smak.

Pavodle słoŭ zahadčycy adździaleńnia, hryby majuć zdolnaść pahłynać z navakolnaha asiarodździa i nakoplivać taksičnyja rečyvy ŭ kancentracyjach, jakija ŭ niekalki razoŭ pieravyšajuć ich kolkaść u hlebie, vadzie, raślinach. Tamu ŭsie hryby nieabchodna advarvać, a advar źlivać. Pa hetaj pryčynie nielha źbirać hryby ŭzdoŭž aŭtatras, pobač z pramysłovymi pradpryjemstvami, u miežach horada.

Paśla zboru dary lesu treba jak maha chutčej adsartavać i apracavać. Hetym pavinny zajmacca tolki darosłyja. Treba pamiatać, što navat jadomy hryb, kali jon pieraśpieŭ, pačaŭ padhnivać na pni abo doŭha lažaŭ biez apracoŭki, moža stać jadavitym. Salić, sušyć, marynavać kožny vid hryboŭ treba paasobku. A pierad advarvańniem dobra myć ad piasku i hleby. Nielha nie źviartać uvahi na praviły hatavańnia ŭmoŭna-jadomych hryboŭ: ich nieabchodna advarvać minimum dvojčy, kožny raz nie mienš za 50 chvilin. Abodva razy paśla varki pramyvać pratočnaj vadoj.

Nie treba źbirać i kuplać na rynku pierarosłyja, viałyja, paškodžanyja ličynkami i ćvillu hryby. Niepažadana kuplać na rynku i z ruk hrybnyja kansiervy, hiermietyčna zakrytyja nakryŭkami ŭ damašnich umovach, a taksama suchija hryby, hrybnuju ikru i roznyja sałaty, pryhatavanyja z dabaŭleńniem hetych daroŭ lesu. Płaścinistyja hryby nieabchodna kuplać tolki z nožkami. Takim čynam možna identyfikavać biełuju pahanku, jakaja maje kłubniepadobnaje pataŭščeńnie nožki «kaŭnieryk».

Baćkam treba pamiatać, što hryby pavinny być vyklučany z racyjonu dziaciej. Nielha ŭžyvać ich u ježu ludziam z chvarobami piečani i abmienu rečyvaŭ, asobam sastarełaha ŭzrostu. Pry źjaŭleńni pieršych simptomaŭ atručeńnia treba nieadkładna źviartacca pa miedycynskuju dapamohu.

• 0
• 0
• 0
• 0
• 0