Biełaruskija ŭdzielniki «Jeŭrabačańnia-2017» u Kijevie Naviband zapisali biełaruskuju viersiju pieśni «Fields Of Gold» i vykłali na svoj kanał u Youtube.
— Stynh — naš sapraŭdny kumir i praśpiavać ź im, nasamreč, naša mara. Pierad konkursam «Jeŭrabačańnie» na pytańni pra niazbytnaje žadańnie kazali, što chočam praśpiavać sa Stynham. Nu i ciapier źjaviŭsia šaniec: naš kumir pryjazdžaje ŭ Minsk, my ludzi avanturnyja i vyrašyli, čamu b nie zrabić niekalki krokaŭ da mary i nie napisać jamu takim čynam. Vierym u teoryju šaści pociskaŭ ruki, — prakamientavaŭ salist Naviband Arciom Łukjanienka.
— Darahi Stynh! My Naviband ź Biełarusi. Dziakuj Vam za muzyku, jakaja natchniaje nas z samaha rańniaha ŭzrostu. Daŭno maru praśpiavać z Vami na adnoj scenie ci prosta sustrecca. My spadziajomsia, što Vy zmožacie ŭbačyć heta videa i naša mara zbudziecca. My rady bačyć Vas u Minsku i ź nieciarpieńniem čakajem kancertu 8 kastryčnika. Da sustrečy! Spadziajomsia, što Vam spadabajecca biełaruskaja viersija lehiendarnaj pieśni «Fields Of Gold», — napisali ŭ svaich sacyjalnych sietkach Naviband.
Nahadvajem, Stynh vystupić u Minsku ŭ ramkach suśvietnaha turne «57th&9th». Za svaju bolš čym 40-hadovuju karjeru na rachunku artysta bolš za paŭsotni uznaharod: 16 statuetak Grammy, 25 uznaharod American Music Awards, MTV Music Awards, «Załaty hłobus» za saŭndtrek da filma «Kiejt i Lea» i mnohija inšyja. Stynh — kamandor ordena Brytanskaj impieryi, kavaler francuzskaha ordena Mastactvaŭ i litaratury, a taksama ŭładalnik hanarovaj uznaharody centra mastactvaŭ imia Džona Kenedzi. Jon trojčy naminavaŭsia na Oskar u katehoryi «Najlepšaja pieśnia da filma», a na «Alei Słavy» ŭ Halivudzie možna dakranucca da imiannoj zorki śpievaka.
Košt kvitkoŭ: fan-zona — 190 rub, tancplac — 140 rub, siektary — 90 — 300 rub.
Bilety možna nabyć na sajcie allstars.by, u biletnych apierataraŭ, a taksama ŭ kasach horada.
Daviedki pa telefonach: +375 29 650 11 33, +375 29 763 11 11
