U kułuarach Biełaruskaha inviestycyjnaha foruma my spytalisia ŭ namieśnika ministra ekanomiki Paŭła Uciupina, jak tyja ludzi, jakija pracujuć za kapiejki na datacyjnych dziaržaŭnych zavodach, mohuć źmianić svajo žyćcio i zarablać bolš.
Pavieł Uciupin, fota Siarhieja Hudzilina
My taksama pryhadali historyju, jakuju «Našaj Nivie» raskazvała Natalla Nikandrava, — kali bujnaja mižnarodnaja šviedskaja kampanija nie zdoleła znajści ŭ Biełarusi patrebnuju kolkaść kvalifikavanych kadraŭ dla adkryćcia filijała vytvorčaści.
Najpierš čynoŭnik skazaŭ, što dziaržava nie płanuje zakryvać zavody.
«Ja b nie apieryravaŭ takimi terminami jak «bałast», «skidvać», u nas sacyjalna-aryjentavanaja dziaržava, masavych zvalnieńniaŭ nie budzie», — skazaŭ jon.
«A pytańnie vašaje fiłasofskaje, — praciahnuŭ jon. — Tut treba dumać pra samaŭdaskanaleńnie. Voś, skažam, ja ŭ ministerstvie adkazvaju za supracoŭnictva z Kitajem, u tym liku. I ja adčuvaju, jak anhlijskaj movy mnie ŭžo brakuje, šukaju mahčymaść vučyć kitajskuju. Ja da taho, što kožny sam pavinien adčuvać situacyju i raźvivacca ŭ niejki bok, ale hałoŭnaje — raźvivacca. Kab nie zarablać kapiejki… Ja vieru, što ŭ nas šmat inicyjatyŭnych ludziej, jakija zmohuć zarablać u biznesie. Ułasna, na heta i nakiravanyja tyja prajekty źmienaŭ, jakija buduć pryniatyja ŭ chutkim časie.
Kudy iści? Heta ramieśnictva, ahrasiadziby, śfiera pasłuh…
Ja nie kažu, što tolki pryvatny biznes nas vyratuje. Z dośviedu viedaju, što kali ŭ čałavieka niama «žyłki», jon nie zmoža hetym zajmacca. Tamu treba cikavaść da atrymańnia novych viedaŭ i kampietencyj samastojna, dziaržava tut dapamoža kursami pierapadrychtoŭki abo finansami dla adkryćcia spravy — nieŭzabavie ich (hrošaj) treba budzie našmat mieniej, kab uvajści ŭ biznes».
Čynoŭnik taksama kanstatavaŭ, što chacia pierad miascovymi ŭładami i staić zadača pracaŭładkavańnia biespracoŭnych ludziej, idzie heta nie tak paśpiachova: maŭlaŭ, treba pryznać, što biełarusy źjazdžajuć na zarobki ŭ inšyja krainy.
«Z adnaho boku, nie zabaroniš im vyjazdžać, ale kiepska, što jany znachodziać mahčymaści pracavać u Polščy i Rasii. Treba, kab jany stvarali dadatkovuju vartaść u našaj krainie. Tamu pierad nami i stajać zadačy, na ŭsich uzroŭniach, stvaryć mahčymaści dla pracy i viarnuć takich rabočych na Radzimu», — skazaŭ Uciupin.
Na pytańnie, dyk kali ž biełarusy pierastanuć jeździć u Polšču i Rasiju, čynoŭnik raźvioŭ rukami.
