«Moža, prosta niedzie padarožničaje»: źnikłamu ŭ Biełaviežskaj puščy Maksimu Marchaluku spoŭniłasia 11 hadoŭ
10 kastryčnika Maksimu Marchaluku, jaki prapaŭ u Biełaviežskaj puščy 16 vieraśnia, spoŭniłasia 11 hadoŭ. Chłopčyk usio jašče nie znojdzieny. U Novym Dvary ničoha nie nahadvaje pra toje, što jašče dva tydni tamu tut prachodziła samaja vialikaja za apošni čas pošukava-vyratavalnaja apieracyja ŭ krainie: tady ŭ nievialiki pasiołak pryjechała bolš za dźvie tysiačy vałancioraŭ. Ale aktyŭnyja pošuki, na žal, nie prynieśli nijakaha vyniku.
- Ja mamie chłopčyka vielmi spačuvaju, ale jak dapamahčy ŭ hetaj situacyi, nie ŭjaŭlaju. U mianie ŭvieś hety čas spynialisia vałanciory. Karmiła, prymała ŭ siabie, — kaža miascovaja žycharka Zoja. — Usie viersii ŭžo abmierkavali. Viadoma, vielmi chočacca, kab jon znajšoŭsia, i vieryš u toje, što jon prosta adpraviŭsia padarožničać.
Niahledziačy na toje, što aktyŭnyja pošuki Maksima ŭ Biełaviežskaj puščy spynienyja, šukać chłopčyka praciahvajuć. Jon abvieščany ŭ mižnarodny vyšuk, a Śledčy kamitet Biełarusi raspačaŭ kryminalnuju spravu pa fakcie źniknieńnia.
Zaraz pošukami zajmajecca ŭ pieršuju čarhu milicyja. Pavodle źviestak pres-słužby UUS Hrodzienskaha abłvykankama, u pošukava-vyratavalnaj apieracyi prymajuć udzieł supracoŭniki milicyi ź Śvisłackaha, Słonimskaha, Zelvienskaha, Mastoŭskaha RAUS, a taksama vajskoŭcy ŭnutranych vojskaŭ i supracoŭniki MNS. Jany abśledujuć najbolš ciažka nieprachodnyja i zabałočanyja miescy.
— Viedajecie, kolki tut viersij było? Što tolki ludzi ni kazali: maŭlaŭ, skrali dzicia, źbieh za miažu, patanuŭ u bałocie, ale heta ŭsio zdahadki, a jak na samoj spravie było — nieviadoma. U carkvie my molimsia za toje, kab Maksim byŭ znojdzieny žyvym i cełym, — kaža miascovy pravasłaŭny śviatar ajciec Anatol.
Siamja Maksima — kataliki, ale i ŭ pravasłaŭnym chramie Novaha Dvara prychadžanie zakazvajuć słužby ab zdaroŭi dziciaci.
…Pra toje, što ŭ źnikłaha chłopčyka 10 kastryčnika dzień naradžeńnia, u ahraharadku, zdajecca, viedajuć usie. Adrazu ž paviedamlajuć: siońnia jamu spoŭniłasia 11 hadoŭ. I dadajuć: užo chutka miesiac, jak Maksima šukajuć.
Piać faktaŭ pra Natallu Piatkievič — samuju ŭpłyvovuju čynoŭnicu Biełarusi da źjaŭleńnia Kačanavaj i Ejsmant31
Kamientary