Kiraŭnik hramadzianskaj kampanii «Napierad, Biełaruś» — nie deputatka Pałaty pradstaŭnikoŭ Hanna Kanapackaja, a jaje pamočnik Dzianis Cichanienka. Pra heta siońnia spadarynia Kanapackaja paviedamiła na svajoj staroncy ŭ Facebook.
«Inicyjujučy hramadzianskuju kampaniju «Napierad, Biełaruś!», ja zychodziła ź nieabchodnaści znajści formy supracoŭnictva ź ludźmi, jakija chočuć pazytyŭnych źmien u krainie, ale z tych ci inšych pryčyn nie hatovyja adkryta zajaŭlać ab padtrymcy apazycyi. Zvarot byŭ paddadzieny krytycy na pasiadžeńni Palitrady Abjadnanaj hramadzianskaj partyi. Sapraŭdy, niekatoryja farmuloŭki majoj zajavy byli nie zusim karektnyja, što vyklikała šmat pytańniaŭ. Ja nia raz u svaich vystupach u ŚMI padkreślivała i znoŭ źviartaju ŭvahu na toje, što heta hramadzianskaja kampanija. Jaje kiraŭnikom źjaŭlajecca moj pamočnik Dzianis Cichanienka», — napisała deputatka.
Hanna Kanapackaja taksama zajaviła, što ŭ ramkach pravacentrysckaj kaalicyi jana praciahvaje padtrymlivać i matyvavać ludziej, jakija adkryta hatovyja pryniać aktyŭny ŭdzieł u palityčnym žyćci krainy, u tym liku ŭdzielničać u vybarčaj kampanii ŭ miascovyja saviety deputataŭ:
«Jašče raz zaklikaju ŭsich nieabyjakavych ludziej być aktyŭnymi, stanavicca kandydatami abo dałučacca da kamandaŭ kandydataŭ na miascovych vybarach ad kaalicyi. Sučasnaść i budučynia našaj krainy zaležyć tolki ad nas z vami, ad taho, ci hatovyja my brać adkaznaść za jaje los».
Hanna Kanapackaja pavinna była dezavujavać dakument ab stvareńni hramadzianskaj kampanii «Napierad, Biełaruś» i paviedamić pra svajo rašeńnie Palitradzie partyi nie paźniej za 16 kastryčnika. Takoje rašeńnie Palitrada pryniała ŭ piatnicu, 13 kastryčnika, kali razhladała pytańnie ab novym ruchu. Kiroŭny partyjny orhan nazvaŭ dakument ab stvareńni kampanii «Napierad, Biełaruś» «nieprymalnym i parušajučym statut partyi».
Jak paviedamiła staršynia vykankamu AHP Aksana Kryščanovič, nichto ź siabraŭ Palitrady nie atrymlivaŭ zajavaŭ ad Kanapackaj na elektronnuju poštu.
Kamientary