Pabačyŭ śviet prajekt partału TuzinFM «(Nie) rasstralanaja paezija», hierojami jakoha stali 12 biełaruskich piśmieńnikaŭ, rasstralanych u 1937-m hodzie. Na ich słovy viadučyja muzyki krainy stvaryli pieśni, na facebook źjavilisia staronki ichnaj pamiaci, daśledčyki padrychtavali lekcyi pra ich žyćcio i tvorčaść, z druku vyjšli dyzajnerskija natatniki z vyjavami tvorcaŭ i cytatami ź ich tvorami.
Prajekt «(Nie)rasstralanaja paezija» — plon paŭhadavoj pracy bolš čym 60 čałaviek: muzykaŭ, daśledčykaŭ litaratury, dyzajneraŭ, saŭndpradusaraŭ, režyseraŭ dy aktoraŭ. U kranalnym proma-roliku Arcioma Łobača ŭ roli «paetaŭ maładoj krainy» źnialisia Pavał Charłančuk, Alena Hiranok i Andrej Saŭčanka. Taksama źjaviłasia 12 videazvarotaŭ udzielnikaŭ prajektu z zaklikam źviarnuć uvahu na paetaŭ 1930-ch hadoŭ.
Muzyku da vieršaŭ rasstralanych u 1937-m litarataraŭ pahadzilisia napisać viadučyja biełaruskija vykanaŭcy. Kožny ź ich pa-svojmu adhuknuŭsia na tuju radaść i bol, spadzievy i biezvychodnaść, jakimi prasiaknutyja tvory paetaŭ. Jakraz hetuju supiarečlivaść pačućciaŭ pieradaje ŭ svajoj pjesie na słovy Jurki Lavonnaha «Nastroi» hurt Vuraj. Reper Vinsent napisaŭ list paetu Ziamu Pivavaravu ŭ adkaz na jahonaje zachapleńnie budaŭnictvam metro ŭ Maskvie: «Ty im prakapaŭ metro, jany tabie — mahiłu». Śviatłana Bień vyrašyła pieradać nastroj vierša Izi Charyka praz mistyčnuju kampazycyju, u jakoj hučyć žyvy hołas siarod biazmoŭnaj suśvietnaj pustečy. Lavona Volskaha kranuŭ liryčny vierš Julija Taŭbina, u jakim 18-hadovy paet sumuje pa svajoj maładości, a hurt Naka vykanaŭ pieśniu na vierš Valeryja Marakova, u jakim hučyć trahičnaja pradvyznačanaść: «Chtoś budzie na našych mahiłach viasnoj śpiavać z zachapleńniem pra ščaście i volu!». Niečakany trek zapisaŭ Źmicier Vajciuškievič. Kab pieradać svajo adčuvańnie vierša Ŭładzisłava Hałubka «Budučynia» jon sploŭ razam elektronnuju i klasyčnuju muzyku. Hullivy bluz na słovy Majsieja Kulbaka stvaryŭ Pavał Arakielan. Pieśniaju zrabili apaviadańnie Michasia Zareckaha muzyki z hurtu Re1ikt. Niby admysłova dla hurtu Dzieciuki Michaś Čarot napisaŭ vierš «Buntar», taja ž historyja ź vieršam Anatola Volnaha «Ja ciabie pakachaŭ», jaki vydatna padyšoŭ pad idejnuju dy estetyčnuju kancepcyju hurtu Akute. Vielmi kranalnaj atrymałasia pieśnia ŭ Kaciaryny Vadanosavaj na vierš Alesia Dudara «Asypaje červień bieły sad». Pieśni byli zapisanyja (akrom Śviety Bień i Akute) i źviedzienyja saŭnpradusaram prajektu Paŭłam Siniłam na studyi Everest.
Padziakavać za prajekt
Cpampavać albom adnym fajłam z TuzinFM
Usie pieśni z prajektu «(Nie) rasstralanaja paezija» udzielničajuć u admysłovym tury hit-paradu na TuzinFM. U kamernym hučańni jany pradstaŭlajucca na lekcyjach prajektu, jakija prachodziać z pačatku vieraśnia štotydnia ŭ kniharni «Łohvinaŭ». Daśledčyki biełaruskaj litaratury apaviadajuć pra žyćcio i tvorčaść kožnaha z 12 paetaŭ-hierojaŭ «(Nie)rasstralanaj paezii». Lekcyi tranślujucca onłajn u Facebook praz staronki paetaŭ, jakija taksama byli stvoranyja ŭ miežach hetaha prajektu. Staronki napaŭniajucca fota, vieršami, uspaminami pra hetych asobaŭ. Adrasy ŭsich staronak možna znajści ŭ hajdzie pa prajekcie, jaki padrychtavaŭ sajt 34mag.net.
Płej-list usich lekcyj prajektu
Lekcyi buduć praciahvacca da 16 listapada. 27 kastryčnika Viktar Žybul raspaviadzie pra Ziamu Pivavarava, a Vinsent vykanaje pieśniu z prajektu. 31 kastryčnika Anton Rudak padzielicca samymi cikavymi faktami ź bijahrafii Valeryja Marakova (pry ŭdziele Naka). 3 listapada pra Ŭładzisłava Hałubka raskaža Vasil Drańko-Majsiuk (čakajecca premjera pieśni ad Źmitra Vajciuškieviča). Lekcyja Hanny Sieviaryniec 10 listapada budzie pryśviečanaja Alesiu Dudaru (pry ŭdziele Kaciaryny Vadanosavaj), a zavieršyć cykl Andrej Chadanovič raspoviedam pra Todara Klaštornaha (hrać budzie TonqiXod). Na kožnaj ź lekcyj možna nabyć dyzajnerskija natatniki aŭtarstva Kaciaryny Pikireni z vyjavaju kožnaha z paetaŭ i cytataju ź jahonaha tvoru.
Kancertnaja prezentacyja prajektu projdzie 29 kastryčnika ŭ mienskim klubie «Briuhhie». Kvitki na jaje skončylisia za čatyry dni da pačatku imprezy.
Kropka ŭ prajekcie «(Nie)rasstralanaja paezija» na prezentacyi albomu, lekcyjach i kancercie nia budzie pastaŭlena. Pradusar prajektu Siarhiej Budkin kaža, što mahčymy praciah. Što dy jak budzie rabicca dalej zaležyć u tym liku i ad padtrymki słuchačoŭ, jakuju možna vykazać da 17 listapada praz Talaka.by.
Kamientary