U ZŠA i Jeŭropie adreahavali na abviaščeńnie niezaležnaści Katałonii

Dziaržaŭny departamient ZŠA zajaviŭ, što Katałonija źjaŭlajecca nieadjemnaj častkaj Ispanii, paviedamlaje VVS.

«Złučanyja Štaty padtrymlivajuć kanstytucyjnyja miery ispanskaha ŭrada, nakiravanyja na toje, kab Ispanija zastavałasia mocnaj i adzinaj», — zajaviła pres-sakratar Dziarždepartamienta Chiezier Noert.

Staršynia Jeŭrapiejskaj rady Donald Tusk zajaviŭ, što Ispanija «zastajecca adzinym surazmoŭcam» dla ES.

«Dla ES ničoha nie źmianiłasia. Ispanija zastajecca našym adzinym surazmoŭcam. Ja spadziajusia, što ispanski ŭrad addaść pieravahu sile arhumientaŭ, a nie sile jak arhumientu», — napisaŭ Tusk u tvitary.

Hiermanija nie pryznaje adnabakovaje abviaščeńnie niezaležnaści Katałonii, paviedamiŭ pres-sakratar urada FRH Štefien Zibiert. Jon zaklikaŭ Madryd i Barsiełonu da dyjałohu.

«Fiederalny ŭrad nie pryznaje takuju dekłaracyju niezaležnaści, — zajaviŭ Zibiert. — Suvierenitet i terytaryjalnaja cełasnaść Ispanii źjaŭlajucca i zaŭsiody buduć niedatykalnymi».

«My spadziajomsia, što załučanyja baki vykarystoŭvajuć usie najaŭnyja mahčymaści dla dyjałohu i źnižeńnia napružanaści», - dadaŭ jon.

Ministr zamiežnych spraŭ Ukrainy Pavieł Klimkin vykazaŭ padtrymku terytaryjalnaj cełasnaści Ispanii.

«Ukraina padtrymlivaje dziaržaŭnuju niezaležnaść i terytaryjalnuju cełasnaść Ispanii ŭnutry jaje mižnarodna pryznanych miežaŭ», - napisaŭ jon u svaim tvitary.

U inšym paviedamleńni jon adznačyŭ, što Ukraina padtrymlivaje miery ispanskaha ŭrada pa vyrašeńni kryzisu ŭ adpaviednaści z kanstytucyjaj, prychilnaściu zakonu i pavahaj da pravoŭ usich hramadzian».

Uśled za inšymi jeŭrapiejskimi krainami ab niepryznańni niezaležnaści Katałonii zajaviła Vialikabrytanija.

«Złučanaje Karaleŭstva nie pryznaé i nie pryznáie dekłaracyju niezaležnaści, abvieščanuju rehijanalnym parłamientam Katałonii. Jana zasnavanaja na hałasavańni, pryznanym nielehalnym ispanskim sudom. My chacieli b i ŭ dalejšym bačyć viaršenstva zakona, pavahu ispanskaj kanstytucyi i zachavańnie cełasnaści Ispanii», — havorycca ŭ zajavie brytanskaha ŭrada.

Žan-Kłod Junkier zajaviŭ ab nieabchodnaści praduchilić padzieł dziaržaŭ Jeŭrasajuza.

«Ja nie chaču zaŭtra akazacca ŭ situacyi, kali ES składajecca z 95 roznych dziaržaŭ. Nam treba paźbiehnuć razdrobnienaści, u nas i tak ich dastatkova», — zajaviŭ staršynia Jeŭrakamisii Žan-Kłod Junkier, jaki znachodzicca ŭ Francuzskaj Hviniei razam z prezidentam Francyi Emanuelem Makronam.

Emanuel Makron zajaviŭ ab svajoj poŭnaj padtrymcy Marjana Rachoja.

«Ja zaŭsiody kazaŭ, što ŭ mianie adzin surazmoŭca ŭ Ispanii. Heta premjer Marjana Rachoj, — skazaŭ Makron. — U Ispanii dziejničajuć zakony, pałažeńni kanstytucyi. Rachoj choča, kab hetyja zakony pavažalisia, i ja jaho całkam padtrymlivaju».

Adzin ź niešmatlikich hałasoŭ, jakija vykazalisia ŭ padtrymku niezaležnaści Katałonii, prahučaŭ z Šatłandyi.

«My razumiejem i pavažajem pazicyju katałonskaha ŭrada. Choć u Ispanii jość prava vystupać suprać niezaležnaści, narod Katałonii pavinien mieć mahčymaść vyrašać svaju ŭłasnuju budučyniu», — zajaviła ministr pa spravach kultury, turyzmu i źniešnich suviaziaŭ va ŭradzie Šatłandyi Fijona Chisłap.

«Siońniašniaje abviaščeńnie niezaležnaści zdaryłasia tolki paśla taho, jak pastajannyja zakliki da dyjałohu byli adprečanyja. Ciapier, bolš čym kali-niebudź, pryjarytetam dla tych, chto ličyć siabie siabrami i sajuźnikami Ispanii, pavinna być zaachvočvańnie pracesu dyjałohu, kab znajści vychad, jaki pavažaje demakratyju i viaršenstva prava. Uviadzieńnie pramoha praŭleńnia nie moža być rašeńniem i pavinna stać pryčynaj dla turboty ŭsim demakratam. U ES jość palityčny i maralny abaviazak padtrymlivać dyjałoh dla vyjaŭleńnia taho, jak možna vyrašyć situacyju mirna i demakratyčna», — dadała jana.

Darečy, ni Kreml, ni MZS Rasii pakul nijak nie prakamientavali abviaščeńnie niezaležnaści Katałonijaj. Treba dadać, što rasijskija dziaržaŭnyja ŚMI ź simpatyjaj vykazvalisia pra imknieńni Katałonii da niezaležnaści i paraŭnoŭvali situacyju z Krymam.

• 0
• 0
• 0
• 0
• 0
• 0
• 0
• 0