U Varšavie, u ramkach dekamunizacyi publičnych nazvaŭ, maje źjavicca vulica hienerała Stanisłava Bułak-Bałachoviča (1883—1940), paviedamlaje radyjo «Svaboda».
Ciapier hetaja vulica, jakaja znachodzicca ŭ kvartale Vaver u pravabiarežnaj častcy Varšavy, nosić imia Branisłava Vesałoŭskaha (1870—1919), kamunistyčnaha dziejača i ŭdzielnika Kastryčnickaj revalucyi.
Zhodna z rasparadžeńniem mazavieckaha vajavody Ździsłava Sipiery, u stalicy Polščy nieŭzabavie buduć źmienieny nazvy 47 vulic.
Pavodle polskaha zakonu z 1 krasavika 2016 hodu pra zabaronu prapahandy kamunizmu abo inšaha tatalitarnaha ładu praz nazvy publičnych abjektaŭ, hetyja nazvy mielisia być źmienienyja da 2 vieraśnia 2017 hodu adpaviednymi orhanami samakiravańnia polskaj stalicy. U vypadku, kali takoje nie adbyvajecca, zakon daje prava pamianiać nazvy ŭ Varšavie kiraŭniku vykanaŭčaj ułady Mazavieckaha vajavodztva.
Stanisłaŭ Bułak-Bałachovič — biełaruski, polski i rasiejski vajskovy dziajač. Aficer kavaleryi Rasiejskaj imperatarskaj armii, hienerał-major Biełaj armii, hienerał Asobnaha atradu BNR, kamandzir dobraachvotnickich atradaŭ polskaj armii ŭ 1920 h., udzielnik hramadzianskaj vajny ŭ Hišpanii na baku hienerała Franka. Paśla akupacyi Polščy Trecim Rajcham sprabavaŭ arhanizavać partyzanski atrad dla baraćby z nacysckimi akupantami, udzielničaŭ u abaronie Varšavy. Byŭ zabity ŭ Varšavie 10 traŭnia 1940 niamieckim patrulom. Miesca jahonaha pachavańnia nieviadomaje.
