Zatrymany siaržant Z. (proźvišča nie nazyvajecca ź mierkavańniaŭ biaśpieki), jaki dniom 3 kastryčnika znajšoŭ u Piečach cieła sałdata terminovaj słužby Alaksandra Koržyča. Radavy byŭ znojdzieny paviešanym ŭ padvale budynka miedroty. Proźvišča Z. u liku inšych zatrymanych nazvaŭ pradstaŭnik prakuratury, jaki 11 listapada sustrakaŭsia ŭ Pinsku z maci i blizkim siabram Koržyča, paviedamlaje Jeŭraradyjo.
Pavodle jaho słoŭ, ciapier u miežach rasśledavańnia śmierci radavoha zaviedziena 8 kryminalnych spraŭ, «pad vartaj znachodzicca ŭ rajonie 20 čałaviek».
Raniej dźvie niezaležnyja krynicy Jeŭraradyjo va ŭzbrojenych siłach u adkaz na pytańnie, chto znajšoŭ cieła Koržyča, nazvali toje ž proźvišča. Abodva vajennasłužačyja raspaviali, što paśla taho, jak radavy byŭ znojdzieny ŭ piatli, Z. adpravili «u Navinki». Adna z krynic dadała, što paśla hetaha Z. trapiŭ «na kičman», heta značyć, jaho ŭziali pad vartu.
Inšaja krynica nazvała Z. «prydurkavatym siaržantam» (u rasparadžeńni Jeŭraradyjo jość aŭdyjozapis) i paviedamiła, što jon pryznaŭsia ŭ zabojstvie Koržyča. Adnak aficyjna hetaja infarmacyja nie paćvierdžanaja.
Alaksandr Koržyč prachodziŭ słužbu ŭ 3-j škole 72-ha hvardziejskaha Abjadnanaha navučalnaha centra ŭ Piečach, a Z. — u 307-j škole. Škoły raźmieščanyja ŭ roznych voinskich častkach i ŭ roznych budynkach, jakija znachodziacca pryblizna ŭ 5 chvilinach chady ad miedroty, dzie znajšli cieła radavoha. Vypadkova apynucca ŭ padvale, u jakim Koržyča znajšli paviešanym, davoli składana. Hetaje pamiaškańnie nie było začynienaje na zamok, ale nie vykarystoŭvałasia, tamu tudy doŭhi čas nichto nie zachodziŭ.
Pavodle infarmacyi ź niekalkich krynic, jakuju Śledčy kamitet nie paćvierdziŭ, ale i nie abvierh, da siaredziny kastryčnika pa padazreńni ŭ niestatutnych adnosinach byli zatrymanyja piaciora siaržantaŭ z 307-j škoły. Baćka sałdata terminovaj słužby, jaki słužyć u hetaj škole, raspavioŭ Jeŭraradyjo, što zatrymańni praciahnulisia ŭ kancy miesiaca.
Ź siaržantam, jaki znajšoŭ cieła Alaksandra Koržyča, źviazanaja adna ź viersij, jakuju raspracoŭvaje niezaležnaje rasśledavańnie taho, što adbyłosia.
U pieršyja dni paśla taho, jak sprava atrymała rozhałas, na suviaź ź blizkimi radavoha vyjšła dziaŭčyna. Jana raspaviała, što ŭ materyjałach pravierki ŭžo jość proźvišča mierkavanaha zabojcy, ustanoŭlenaje pa haračych śladach. Heta, maŭlaŭ, i jość toj samy vajskoviec, jaki «znajšoŭ» Sašu paviešanym ŭ padvale miedsančaści.
«Jaho turbavała, što prajšoŭ čas, a Koržyča nichto nie šukaje. Jon dapuskaŭ, što achviara zmahła vyzvalicca ź piatli i ŭžo daje pakazańni. I tady sam pajšoŭ u padvał, nibyta za vienikam (choć viadoma, što invientar dla pryborki składzieny ŭ inšym miescy), a na samaj spravie, kab pierakanacca va ŭłasnaj biaśpiecy», — śćviardžaje dziaŭčyna.
Taksama jana raspaviała, što hety vajskoviec vioŭ dziońnik na anhlijskaj movie, u jakim apisaŭ padrabiaznaści zabojstva Alaksandra Koržyča. Padobnymi śviedčańniami dzialilisia vajskoŭcy z častki, u jakoj słužyŭ Koržyč. Adnak u ciapierašni čas suviazi z hetaj dziaŭčynaj niama, a jaje staronka «Vkontaktie» vydalenaja, tamu da jaje viersii varta stavicca skieptyčna.
Jak raspaviała Jeŭraradyjo aficyjny pradstaŭnik Śledčaha kamiteta Julija Hančarova, infarmacyja, jakuju viedamstva raspaŭsiudžvała raniej, da hetaha momantu zastajecca aktualnaj. Heta značyć, što śledstva pa-raniejšamu razhladaje try viersii zdareńnia ŭ čaści №43064 ŭ Piečach: suicyd, daviadzieńnie da samahubstva i zabojstva.
***
Na telehram-kanał «Našaj Nivy» možna padpisacca tut.
