Sudździa Aršanskaha suda trapiła pad mašynu ŭviečary 11 listapada.
45-hadovaja Taćciana Rybakova jechała na aŭtamabili «Sitrajen» u jakaści pasažyrki. Niezdalok ad Tałačyna na trasie M1 mašyna trapiła ŭ avaryju — ad «Piežo», jaki jechaŭ nasustrač, na chadu adlacieła koła. Koła vypadkova trapiła mienavita ŭ hety «Sitrajen». Daviałosia spynicca abodvum mašynam. Rybakova stała vyklikać supracoŭnikaŭ DAI.
Niekatoruju infarmacyju joj treba było ŭdakładnić u kiroŭcy «Piežo», dla čaho jana pajšła praz darohu na druhi bok. Pa toj ža darozie jechaŭ «Chionde». Žančyna była bieź flikieraŭ, tamu kiroŭca jaje nie zaŭvažyŭ. Ad udaru žančynu vykinuła z darohi ŭ kiuviet. Jana zahinuła na miescy avaryi.
46-hadovaha kiroŭcu «Chionde» paśla dopytu adpuścili pad padpisku ab nievyjeździe, paviedamlaje Śledčy kamitet. U dačynieńni da kiroŭcy raspačali kryminalnuju spravu za parušeńnie PDR, jakoje pryviało da śmierci pa nieaściarožnaści. Mužčynu pahražaje da 5 hadoŭ pazbaŭleńnia voli.
Taćciana Rybakova nabyła viadomaść paśla pracesaŭ nad aktyvistami i apazicyjanierami. U pryvatnaści, jana asudziła Paŭła Sieviarynca na 15 sutak za udzieł u «Maršy niedarmajedaŭ». U 2007 hodzie Rybakova karała sutkami mastaka Alesia Puškina za toje, što jon vykinuŭ z vakna RAUSa čyrvona-zialony ściah, u 2012 hodzie sudziła pravaabaroncu Valeryja Ščukina nibyta za chulihanstva i niepadparadkavańnie milicyi.
***
Na telehram-kanał «Našaj Nivy» možna padpisacca tut.
