Ahulnaje fota ŭdzielnikaŭ samita «Uschodniaha partniorstva». Fota consilium.europa.eu.
Kiraŭnik biełaruskaj delehacyi na samicie «Uschodniaha partniorstva» ŭ Bruseli, ministr zamiežnych spravaŭ Uładzimir Makiej pa zaviaršeńni mierapryjemstva cełuju hadzinu razmaŭlaŭ z žurnalistami.
Makiej byŭ u vielmi pazityŭnym nastroi, šmat uśmichaŭsia i žartavaŭ. Varta adznačyć, što daloka nie ŭsie kiraŭniki delehacyj byli nastolki ž adkrytyja dla razmovaŭ z presaj. Parašenka faktyčna ŭciakaŭ ad žurnalistaŭ. Alijeŭ, Sarhsian rabili toje ž samaje. Makiej adkazvaŭ na pytańni, pakul nie skončylisia, bolš za hadzinu.
«Heta byŭ adzin z samych paśpiachovych samitaŭ «Uschodniaha partniorstva». Upieršyniu bieź vialikich sprečak była pryniataja vynikovaja dekłaracyja. Hetaja dekłaracyja adpaviadaje našym čakańniam. Važna, kab jana była nakiravanaja ŭ budučyniu. Dekłaracyja nie maje kanfrantacyjnaha charaktaru i nie nakiravanaja suprać trecich dziaržaŭ. Samit prajšoŭ na pazityŭnaj nocie», — adznačyŭ Makiej.
Dalej ministr šmat havaryŭ, što samaje važnaje na siońniašni dzień — heta stabilnaść u našym rehijonie. «My zacikaŭlenyja ŭ bolš prahmatyčnym, zaziemlenym charaktary adnosinaŭ. Uzajemadziejańnie musić być nacelenym na kankretnyja vyniki, kab zvyčajnyja ludzi adčuli, što takoje «Uschodniaje partniorstva». Nie niejkaje tam partniorstva na ŭschodzie, a što heta za prahrama. Naprykład, u Breście, kab dziakujučy «Uschodniamu partniorstvu» była adnoŭlenaja pamiežnaja infastruktura, źjavilisia novyja tranzitnyja kalidory, a adpaviedna i novyja pracoŭnyja miescy».
Niemahčyma było abyści temu Rasii. Uładzimir Makiej skazaŭ, što nie dziakujučy Biełarusi Rasija nijakim čynam nie zhadvajecca ŭ vynikovaj dekłaracyi. «My zacikaŭlenyja ŭ bolš ciesnym supracoŭnictvie pamiž jeŭrazijskimi i jeŭrapiejskimi intehracyjnymi abjadnańniami. Patrebny bolš ciesny dyjałoh, nakiravany na ŭznaŭleńnia davieru pamiž nami», — adznačyŭ ministr.
«My nie stavim zadaču, i nichto ad nas nie patrabuje strymhałoŭ biehčy ŭ ES, my źjaŭlajemsia siabram Jeŭrazijskaha ekanamičnaha sajuza, nam treba jaho raźvivać. Adnak vielmi važnaj źjaŭlajecca tema dyviersifikacyi, kab my syšli ad zaležnaści ad adnoj krynicy, nakirunku. Kab my ŭ kryzisnaj situacyi mahli mieć niejkija paduški. Jeŭrapiejski sajuz — heta vielmi važny handlova-ekanamičny partnior. My nie budziem razryvać partniorskija suviazi z Rasijaj, ale treba raźvivać ź ES i bolš dalokaj duhoj», — heta nie novaja pazicyja MZS. I jahony kiraŭnik časta ahučvaje takuju aficyjnuju pazicyju.
Kali pytańni Makieju zadavali pa-biełarusku, ich było niamała, u tym liku ad «NN», to Makiej adkazvaŭ pa-biełarusku. Adznačym, što mova Makieja pravilnaja, havoryć jon na joj amal biez pamyłak. Źviartała ŭvahu, što ministr užyvaŭ słova «źviaz», a nie «sajuz».
Uładzimir Makiej na samicie Uschodniaha Partniorstva — 2017.
«Kali kazać maje asabistyja adčuvańni, to z 25 hadoŭ niezaležnaści my mieli 20 hadoŭ abmiežavańniaŭ u adnosinach ź ES, to sankcyi niejkija, to jašče što. Letaś u lutym bolšaść sankcyj byli admienienyja. Dziakuj bohu, što da jeŭrapiejcaŭ pryjšło razumieńnie, što niemahčyma imhnienna niešta źmianić. U nas roznyja situacyi — mientalitet, kantekst, dabrabyt. Ciapier jeŭrapiejcy razumiejuć, što nieabchodna mieć dyfierencyjavany padychod. Biełaruś nikoli nie była krainaj, jakaja stvarała prablemy Jeŭraźviazu. Naša miaža — samaja nadziejnaja».
Čynoŭnik adznačyŭ, što da nastupnaha samitu praz dva hady Biełaruś padydzie z kankretnymi dakumientami.
«Biełaruś padydzie da hetaha samitu z novym uzroŭniem supracoŭnictva ź Jeŭropaj. Buduć pahadnieńni, pra jakija ŭsie buduć havaryć. Nie budu kankretna havaryć pra damoŭlenaści. My zacikaŭlenyja, kab bazavaje pahadnieńnie pamiž Biełaruśsiu i ES było padpisana jak maha chutčej. Nakont vizaŭ sapraŭdy zastałosia zusim mała techničnych i 1-2 palityčnych momantaŭ, nad jakimi my pracujem. My možam pieraadoleć hetyja ciažkaści», — havorka pra źmianšeńnie cany šenhienskich vizaŭ dla hramadzian Biełarusi.
Kali žurnalistka STV spytałasia, ci hučali na samicie antyrasijskija zajavy, to Makiej adkazaŭ: «Nie viedaju, što razumieć pad vostrymi «antyrasijskimi vystupami». Kaniečnie ž, z vusnaŭ niekatorych dziaržaŭ hučała krytyka Rasii ŭ suviazi z padziejami ŭ Krymie i ŭschodzie Ukrainy. Ale pieravažnaja bolšaść vystupoŭcaŭ kazała, što «Uschodniaje partniorstva» nie nakiravana suprać trecich krain. Niama nijakich antyrasijskich pasažaŭ i ŭ vynikovaj dekłaracyi».
Karespandent «Našaj Nivy» pacikaviŭsia, ci mieŭ Makiej razmovu z Anhiełaj Mierkiel, ź jakoj siadzieŭ pobač na samicie. «Ja nie zvyksia chvalicca svaimi sustrečami, raskazvać, pra što razmaŭlaŭ ź inšymi delehatami. Ja mieŭ sustrečy z kiraŭnikami delehacyj ŭsich krain «Uschodniaha partniorstva». Na łančy siadzieŭ z premjer-ministram Hrecyi. Ja raskazaŭ jamu, jak raźvivajucca našy adnosiny. Niekalkimi słovami pierakinuŭsia z Anhiełaj Mierkiel, ale nie chaču ŭdakładniać pra što kankretna. Byli vielmi cikavyja pieramovy ź jeŭrakamisaram Chanam i viarchoŭnym pradstaŭnikom ES Mahieryni, jość šerah prapanovaŭ, jakija my budziem dalej abmiarkoŭvać».
Ci było padniataje na sustrečy z Parašenkam pytańnie aryštavanaha ŭ Minsku ŭkrainskaha žurnalista Šarojki. «Abmiarkoŭvali», — karotka adkazaŭ Makiej.
