Žurnalist Źmicier Hałko prysutničaŭ na śviatkavańni 15-hodździa svajho syna Jana Chryścijana. Viečar jany skončyli ŭ adździaleńni milicyi, a adzin ź siabroŭ — u reanimacyi. Voś što raskazała pra padziei minskaja milicyja, a što — sam Hałko.
«U subotu 25 listapada ŭviečary padčas patrulavańnia ŭčastkovy milicyjant zaŭvažyŭ, jak na bałkonie druhoha paviercha stajali dzieci, jakija łajalisia matam i vizualna znachodzilisia ŭ stanie ałkaholnaha apjanieńnia, — raskazaŭ aficyjny pradstaŭnik HUUS Minharvykankama Alaksandr Łastoŭski. — Z kvatery danosiłasia hučnaja muzyka.
Učastkovy patelefanavaŭ supracoŭnikam inśpiekcyi pa spravach niepaŭnaletnich. Razam jany nakiravalisia ŭ kvateru. Dźviery adamknuŭ mužčyna ŭ mocnym stanie ałkaholnaha apjanieńnia, za im stajali dzieci. Mužčyna pačaŭ pahražać supracoŭnikam pravaachoŭnych orhanaŭ, vykazvacca niecenzurnaj łajankaj, chapać ŭčastkovaha za formu, — śćviardžaje Łastoŭski. — U kožnym pakoi [kvatera dvuchpakajovaja, na dni naradžeńnia prysutničała 17 čałaviek — NN] znachodzilisia niepaŭnaletnija, tam ža stajali adkrytyja śpirtnyja napoi: harełka, viski, vino, piva, šampanskaje».
Pa infarmacyi milicyi, mužčyna schapiŭ učastkovaha za ruku, sprabavaŭ jamu pieraškodzić. Telefon inśpiektara upaŭ i raźbiŭsia. Inśpiektar taksama śćviardžaje, što ŭžo ŭ kalidory syn mužčyny padbieh da milicyjanta i dvojčy ŭdaryŭ kułakom pa tvary, zatym ŭdary nanios jaho baćka.
«Ciapier u ramkach kryminalna-pracesualnaha kodeksa pravodzicca pravierka», — kaža Łastoŭski.
Źmicier Hałko raspavioŭ «Našaj Nivie» svaju viersiju padziej.
Pa jaho słovach, na 15-y dzień narodzinaŭ jaho syna Jana sabrałasia 17 čałaviek. Sam Źmicier prosta prysutničaŭ tam, «na ŭsiaki vypadak». Mamy Jana, byłoj žonki Źmitra Hałko, u toj viečar doma nie było, jana pajechała da svajoj maci.
«U adnym pakoi byŭ Jan ź siabrami, ja siadzieŭ u inšym, za kampjutaram. Da mianie na niejki čas zajechaŭ siabar, my vypili trochi šampanskaha. Paśla siabar źjechaŭ. Kab padletki štości pili — ja nie bačyŭ. Paśla ŭžo, paźniej, ja zaŭvažyŭ u ich na stale stajała vino — ale heta ŭsio», — raskazvaje Hałko-starejšy.
Kali chtości pazvaniŭ u dźviery. Źmicier adkryŭ, na hanku stajali mužčyna ŭ milicejskaj formie, a ź im — mužčyna i žančyna ŭ cyvilnym.
«Raspaviali, što pastupiŭ da ich vyklik, skarhi na šum… Ja paabiacaŭ muzyku vyklučyć. Jany spytali, a što ŭvohule adbyvajecca ŭ kvatery, ja patłumačyŭ, što syn śviatkuje dzień narodzinaŭ, a ja baćka, — kaža Źmicier Hałko. — Tady ŭ mianie paprasili dakumienty».
Hałko śćviardžaje, što hości «pačali chadzić u botach pa čystaj kvatery, zahladvać u pakoi. Ja paprasiŭ ich vyjści — złačynstva anijakaha nie adbyvajecca, što im tam rabić. Ja nie dazvalaŭ uvachodzić. Milicyjant skazaŭ — baču, što niepaŭnaletnija raśpivajuć ałkahol».
Zaprasiŭšy milicyjanta pakinuć pamiaškańnie, śćviardžaje Hałko, jon uziaŭ jaho za ruku.
«Milicyjant pačaŭ lamantavać, što ja na jaho napaŭ. Udvuch razam z chłopcam u cyvilnym jany mianie pačali krucić. Pačaŭsia verchał, vyskačyŭ moj syn z krykam: «Nie čapajcie baćku!». Prajšło niekalki chvilin — i ŭ kvateru ŭvarvałasia hrupa zachopu, u broniekamizelkach, usio jak treba, bolš za 5 čałaviek ich było dakładna. Kryčali: «Usim stajać, ruki na ścianu!».
«Zatym mianie pakłali tvaram u padłohu, nakinuli kajdanki. Adzieli kajdanki i na majho syna», — raskazvaje Źmicier Hałko.
Pa słovach Hałko, padletki spužalisia i pačali raźbiahacca. Niekatoryja vyskačyli ŭ akno — a kvatera była na druhim paviersie.
Ahułam milicyja zatrymała samoha Hałko, jaho syna i jašče 4—5 padletkaŭ.
Niekatoryja z tych, chto skakaŭ u akno, atrymali traŭmy. U adnaho — złamanaja naha, u druhoha — chrybiet. Hety apošni chłopiec u balnicy, niekalki dzion jon pravioŭ u reanimacyi.
Źmitra Hałko z synam dastavili ŭ Saviecki RUUS.
«Prasiadzieŭ ja za kratami da ranicy 27 listapada, paśla ŭ sudzie Savieckaha rajona pryznali mianie vinavatym, što ja nibyta razmachvaŭ rukami i łajaŭsia matam na vulicy la doma. Sud daŭ mnie štrafu dźvie bazavyja, i mianie adpuścili».
Syna adpuścili raniej, nočču z 25 na 26 listapada, kala 5-j ranicy.
Ciapier, śćviardžaje Źmicier Hałko, jaho syna vinavaciać u tym, što jon udaryŭ milicyjanta. 28 listapada Jana Hałko čakaje kamisija pa spravach niepaŭnaletnich.
