Łukašenka: Usiebiełaruski źjezd 1917 hoda prademanstravaŭ kaštoŭnaści, značnyja i dla ciapierašniaha dnia
Pieršy Usiebiełaruski źjezd 1917 hoda prademanstravaŭ kaštoŭnaści, značnyja i dla ciapierašniaha dnia. Pra heta havorycca ŭ pryvitańni Alaksandra Łukašenki, jakoje jon nakiravaŭ haściam i ŭdzielnikam kanfierencyi «Padziei 1917 hoda ŭ histaryčnym losie Biełarusi», paviedamlaje BiełTA.
Pryvitańnie začytaŭ udzielnikam kanfierencyi pieršy namieśnik kiraŭnika Administracyi prezidenta Maksim Ryžankoŭ.
«Padziei 1917 hoda spryjali imknieńniu biełarusaŭ žyć u svaim domie. Ideja samavyznačeńnia Biełarusi, jakaja išła źnizu, ad inicyjatyvy narodnych mas, vyraziłasia ŭ sklikańni I Usiebiełaruskaha źjezda.
Hety narodny schod prademanstravaŭ najvažniejšyja kaštoŭnaści, značnyja dla nas i da ciapierašniaha dnia: svaju dziaržavu, jaje sacyjalny charaktar i toj fakt, što tolki narod, jaho vola, kalektyŭny rozum i lidary mohuć stać sapraŭdnaj krynicaj niezaležnaści», — havorycca ŭ pryvitańni.
«Źviartajučysia na Usiebiełaruskich narodnych schodach da mierkavańnia tych, chto svajoj pracaj stvaraje našy bahaćci, bačym i druhi ŭrok historyi našaj dziaržaŭnaści: tolki adzinstva ŭsich nas, usiaho našaha biełaruskaha naroda źjaŭlajecca harantam vybaru i zachavańnia samastojnaha šlachu raźvićcia», — padkreśliŭ kiraŭnik krainy.
Na Usiebiełaruskim źjeździe ŭ 1917 hodzie vyrazna prahučała fundamientalnaja ideja — stvareńnie svajho ŭniviersiteta. «Siońnia my jašče bolš razumiejem, što biez adukacyi, biez navuki my nie zmožam umacavać niezaležnaść našaj dziaržavy. Bo asnoŭnaja jaje meta — stvareńnie nie tolki materyjalnych, ale i duchoŭnych asnoŭ dla raźvićcia Čałavieka», — adznačyŭ Alaksandr Łukašenka.
***
Pieršy Usiebiełaruski źjezd prajšoŭ u Minsku 5—17 śniežnia 1917 hoda ŭ haradskim teatry. Jon byŭ sklikany Vialikaj biełaruskaj radaj, na jaho sabralisia biełaruskija palityčnyja dziejačy z usich hubierniaŭ, a taksama pradstaŭniki biełaruskamoŭnych pavietaŭ Kovienskaj i Vilenskaj hubierniaŭ. U Źjeździe ŭziali ŭdzieł 1872 delehaty. Staršynioj byŭ abrany kiraŭnik Biełaruskaj vajskovaj rady Janka Sierada, u budučyni pieršy staršynia Rady BNR.
Źjezd abviaściŭ prava biełaruskaha naroda na niezaležnaść i samavyznačeńnie, a taksama na demakratyčny ŭrad.
Źjezd abraŭ Radu, u skład jakoj uvajšoŭ 71 pradstaŭnik roznych palityčnych partyjaŭ. Balšaviki razahnali źjezd, ale praces abviaščeńnia niezaležnaści byŭ zapuščany. Praz try miesiacy, 25 sakavika 1918 hoda, była abvieščana niezaležnaść Biełaruskaj Narodnaj Respubliki.
Čytajcie taksama:
Kamientary