Mižnarodny alimpijski kamitet (MAK) pryznaŭ vinavatymi ŭ parušeńni antydopinhavych praviłaŭ troch rasijskich spartsmienak. U ich uvajšła bijatłanistka Volha Zajcava.
MAK pažyćciova dyskvalifikavaŭ bijatłanistku Volhu Zajcavu, a taksama łyžnic Anastasiju Dacenka i Juliju Čakalevu. Jany pryznanyja vinavatymi ŭ manipulacyjami z dopinh-probami na Alimpijadzie ŭ Sočy. Ich vyniki na Alimpijadzie anulavanyja. Pra heta paviedamlaje pres-słužba MAK.
Z hetych spartsmienak tolki Volha Zajcava vyjhrała ŭ Sočy miedal — jana stała druhoj u składzie zbornaj Rasii ŭ estafiecie. Hety miedal MAK užo adabraŭ u zbornaj Rasii raniej, kali pryznaŭ vinavatymi ŭ dopinhavych parušeńniach inšych udzielnic estafiety, Volhu Viłuchinu i Janu Ramanavu.
Rasija apuściłasia na treciaje miesca ŭ ahulnakamandnym miedalnym zaliku. U Sočy zbornaja vyjhrała 33 miedali, ciapier heta kolkaść źmienšyłasia da 22 (10 załatych, 5 siarebranych i 7 bronzavych). Lidarstva zachapili narviežcy. U ich 29 uznaharod (11 załatych, 7 siarebranych i 11 bronzavych). Druhimi stali kanadcy — 25 miedaloŭ (10 załatych, 10 srebranych i 5 bronzavych).
MAK prymaje rašeńnie na padstavie vynikaŭ pracy kamisii pad kiraŭnictvam Denisa Osvalda. Hetaja kamisija zajmajecca rasśledavańniem manipulacyj z dopinh-probami padčas Alimpijady ŭ Sočy. Usie vierdykty pa spravach rasijskich spartoŭcaŭ płanujecca abviaścić da 5 śniežnia, kali pačniecca pasiedžańnie vykankama MAK.
Rašeńnie ab udziele zbornaj Rasii ŭ Alimpijadzie 2018 hoda budzie abvieščana 5 śniežnia. Pry jaho pryniaćci MAK budzie ŭličvać taksama vyniki kamisii pad kiraŭnictvam Samuela Šmida, jaki zajmajecca pošukam dokazaŭ isnavańnia ŭ Rasii dziaržaŭnaj dopinhavaj prahramy.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym3
Kamientary