Rasijskija prankiery Uładzimir Kuźniacoŭ (Vavan) i Alaksiej Stalaroŭ (Leksus) raspaviali siońnia, što ŭ treci raz zdoleli pahavaryć pa telefonie z prezidentam Ukrainy Piatrom Parašenkam, na hety raz patelefanavaŭšy jamu ad imia premjer-ministra Hruzii Hieorhija Kvirykašvili, paviedamlajuć RIA-Novosti.
«My patelefanavali Parašenku ad imia premjera Hruzii. Parašenka adrazu pajšoŭ na kantakt, ale byŭ niejki sumny pa telefonie. My abmierkavali situacyju z Saakašvili. Jon skazaŭ, što nibyta jość niejkija dokazy, što jaho finansavali niejkija ŭkrainskija aliharchi i rasijskija śpiecsłužby, što ŭsio heta brydka, i Saakašvili buduć sudzić», — skazaŭ telefonny žartaŭnik.
«My paprasili Parašenka nie vydavać Saakašvili Hruzii, a ŭ kancy pažartavali:» Miša skazaŭ, što vy zanadta šmat pjacie hłohu z harełkaju«. Parašenka zrazumieŭ, što nad im pažartavali, pasłaŭ nas i kinuŭ trubku», — raspavioŭ Kuźniacoŭ.
Jon adznačyŭ, što prankiery ŭžo ŭ treci raz razmaŭlajuć z Parašenkam, niahledziačy na zapeŭnivańni MZS Ukrainy, što nikomu bolš nie ŭdasca razyhrać prezidenta krainy. Ukrainski bok raniej abvinavačvaŭ Leksusa i Vavana ŭ suviaziach z rasiejskimi śpiecsłužbami. Prankiery adprečvajuć hetyja abvinavačańni.
U SBU paviedamili, što Saakašvili buduć pradjaŭlenyja abvinavačańnii pa pieršaj častcy artykuła 256 Kryminalnaha kodeksa Ŭkrainy - «sadziejničańnie ŭdzielnikam złačynnych arhanizacyj i ŭtojvańnie ich złačynnaj dziejnaści», płanujecca dopyt palityka.
Dadzieny punkt hetaha artykuła praduhledžvaje pakarańnie ŭ vyhladzie pazbaŭleńnia voli na termin ad troch da piaci hadoŭ. Hienprakuror Ukrainy Jury Łucenka prapanavaŭ Saakašvili dobraachvotna źjavicca zaŭtra a 9.00 ranicy dla pradjaŭleńnia jamu abvinavačańnia.
Kamientary