«Čamu mianie robiać krajniaj? Ja za biełaruskuju movu!»: deputatka Hujvik adkazvaje na zakidy Anisim
Deputat Natalla Hujvik adkazała na zakidy staršyni Tavarystva biełaruskaj movy, deputatki Aleny Anisim.
Nahadajem, taja narakaje, što Hujvik faktyčna zarezała pieršy zakonaprajekt, jaki moh by być pryniaty adrazu na dźviuch movach.
Čytajcie taksama: Uradženka Rasii, deputatka Hujvik «zarezała» pieršy dźviuchmoŭny zakon
«Naša Niva» u kułuarach Pałaty pradstaŭnikoŭ pacikaviłasia ŭ zhadanaj Natalli Hujvik, adkul u jaje takaja antypatyja da biełaruskaj movy.
Taja adrazu ž zapeŭniła, što nijakaj antypatyi ŭ jaje niama.
«Ja za biełaruskuju movu! Ja za toje, kab zakony prymalisia na dźviuch movach. Čamu mianie robiać krajniaj? Toje, što ja pachodžu z Rasii, nie daje prava mianie abražać ci prypisvać mnie niešta. Ja razumieju biełaruskuju movu! Lublu Karatkieviča!
A situacyja takaja: deputat Anisim nie raspracoŭvała toj zakonaprajekt, pra jaki viadziecca havorka — jana na toj momant nie pracavała ŭ parłamiencie. Jon byŭ uniesieny Savietam ministraŭ na ruskaj movie. I zakon hety nie raspracoŭvaŭsia adrazu na dźviuch movach! Bo pavodle siońniašniaj pracedury, zakon moža być abo na ruskaj, abo na biełaruskaj movie, jak Kodeks ab kultury, naprykład. Na jakoj movie zakon raspracoŭvajecca, na takoj jon i prymajecca, na takoj nad im i pracujuć!
A kab byŭ pierakład, — a ja tolki za toje, kab usie zakony, byli i pa-biełarusku, i pa-rusku, — nieabchodna ŭnieści źmieny ŭ zakon «Ab nacyjanalnym schodzie» i ŭ rehłamient Pałaty pradstaŭnikoŭ. Razumiejecie, ja juryst! My dziejničajem u ramkach pravavoha pola, jakoje isnuje na dadzieny momant, jak ja mahu jaho abyjści?
Spadarynia Anisim vałodaje zakanadaŭčaj inicyjatyvaj. Dyk uniasicie prapanovy takoha źmiestu: u rehłamiencie musić być prapisana, što «zakon, pa rašeńni Pałaty pradstaŭnikoŭ, moža być pierakładzieny na ruskuju abo biełaruskuju movu». Jakija prablemy? Kali jana ŭniasie prapanovy źmienaŭ u zakon «Ab nacyjanalnym schodzie», to my ŭsie za heta prahałasujem! A ciapierašnija akty nie praduhledžvajuć mahčymaści pierakładu», — skazała nam Hujvik.
Ciapier čytajuć
«Vajna ŭsio śpiša». Biełaruskim udzielnikam hiej-prajda ŭ Vilni pahražali raspravaj ad imia biełaruskich vajaroŭ za vykarystańnie bieła-čyrvona-biełaha ściaha149
Kamientary