«Niahledziačy na niekalki zvarotaŭ hramadzian, kiraŭnictva RUP «Nacyjanalny aeraport «Minsk» pa-raniejšamu admaŭlajecca ŭžyvać dziaržaŭnuju biełaruskuju movu na infarmacyjnych šyldach i ŭ raskładzie rejsaŭ», — havorycca ŭ pietycyi, što zapuščanaja na sajcie Petitions.by.
«Nacyjanalny aeraport «Minsk» źjaŭlajecca hałoŭnaj pavietranaj bramaj Respubliki Biełaruś. Heta znakavaje miesca, jakoje sustrakaje i pravažaje ŭ darohu hramadzian Biełarusi, pa jakim mnohija zamiežniki robiać svajo pieršaje ŭražańnie ab našaj krainie i jaje kultury, — pišuć u pietycyi. — Važnym aśpiektam pracy aeraporta źjaŭlajecca infarmavańnie jaho naviedvalnikaŭ praz šyldy i elektronnyja tabło. Pry hetym na siońniašni dzień na infarmacyjnych šyldach Nacyjanalnaha aeraporta «Minsk», a taksama ŭ elektronnym raskładzie rejsaŭ adsutničaje dziaržaŭnaja biełaruskaja mova, rodnaja mova bolšaści žycharoŭ krainy».
Aŭtary pietycyi pišuć: «U 2015—2016 hodzie inicyjatyŭnaja hrupa hramadzian dvojčy źviartałasia da kiraŭnictva RUP «Nacyjanalny aeraport Minsk» z prapanovaj źmiaščać na infarmacyjnych šyldach nadpisy ŭ tym liku i na biełaruskaj movie.
Na pieršy sa zvarotaŭ Administracyja RUP adkazała, što jana «prykładaje maksimum namahańniaŭ pa pašyreńni techničnych mahčymaściaŭ i pošuku finansavych srodkaŭ, jakija b dazvalali raźmiaščać infaramacyju na troch i bolš movach». Na druhi zvarot (dasłany 26 žniŭnia 2016 h.) byŭ atrymany adkaz, maŭlaŭ, dadańnie treciaj movy ŭ bližejšy čas nie płanujecca.
Adnak uvosień 2017 hoda ŭ Nacyjanalnym aeraporcie «Minsk» ŭ elektronnym raskładzie rejsaŭ i ŭ šyldach nadpisy pačali dublavacca na kitajskaj movie, što śviedčyć ab najaŭnaści jak techničnych, tak i finansavych mahčymaściaŭ pašyryć śpis movaŭ na šyldach i na tabło.
Vosieńniu 2017 hoda ŭ presie byli apublikavanyja vašyja kamientary adnosna ihnaravańnia Nacycianalnym aeraportam moŭnych pravoŭ žycharoŭ Biełarusi. Maŭlaŭ, «infarmacyja na biełaruskaj movie nie pieradajecca, kab jana nie skažałasia». Pa-pieršaje, heta vykazvańnie nie padmacavana anijakimi vynikami abjektyŭnych daśledavańniaŭ, jakija b paćviardžali najaŭnaść skažeńniaŭ.
Pa-druhoje, ajčynny i zamiežny dośvied śviedčać ab šmathadovym paśpiachovym vykarystańni niekalkich dziaržaŭnych moŭ u paviedamleńniach na transparcie. U jakaści ajčynnaha prykładu možna pryvieści Minski mietrapaliten. U mižnarodnym aeraporcie stalicy Kanady «Mak-Donald — Karćje» piśmovyja paviedamieleńni (u tym liku i internet-staronka) zroblenyja na dźviuch dziaržaŭnych movach krainy: anhlijskaj i francuzskaj.
Vy taksama adznačacie, što «ruskaja mova, u adroźnieńnie ad biełaruskaj, heta adna z moŭ, jakija pryniatyja ŭ śviecie jak mižnarodnyja. Ale, pa-pieršaje, biełaruskaja mova źjaŭlajecca dziaržaŭnaj movaj Respubliki Biełaruś, a ajčynnaje zakanadaŭstva nie ŭtrymlivaje pałažeńniaŭ, jakija b davali movam, jakija vy nazyvajecie «pryniatymi u śviecie jak mižnarodnyja», pieravahi nad dziaržaŭnaj movaj Respubliki Biełaruś», — havorycca ŭ pietycyi.
«U admovie kiraŭnictva RUP Nacyjanalny aeraport «Minsk» vykarystoŭvać biełaruskuju movu na šyldach i ŭ raskładzie rejsaŭ prasočvajecca supiarečnaść ź dziaržaŭnaj palitykaj ŭ śfiery kultury, jakaja razhladaje biełaruskuju movu jak kaštoŭnaść. U pazicyi kiraŭnictva RUP adnosna biełaruskaj movy nie zaŭvažajecca naležnaj pavahi da nacyjanalnaj movy biełaruskaha naroda.
My prapanujem vam u najbližejšy čas likvidavać supiarečnaści staŭleńnia RUP «Nacyjanalny aeraport Minsk» da pałažeńniaŭ ajčynnaha zakanadaŭstva.
My prosim vas źmiaścić na ŭsich infarmacyjnych šyldach, a taksama na elektronnych i inšych tabło adpaviednyja teksty na biełaruskaj movie i zrabić biełaruskamoŭnuju viersiju internet-staronki vašaha pradpryjemstva», — havorycca ŭ pietycyi.
