Staršynia «Moładzi BNF» Hanna Śmilevič: Kali kamu nie padabajucca maje brovy, chaj na sabie ekśpierymientujuć!

Novaj staršynioj «Moładzi BNF» stała 18-hadovaja Hanna Śmilevič, druhakurśnica Instytuta žurnalistyki BDU. Hetaja pieramoha stała nahodaj zaprasić dziaŭčynu ŭ redakcyju «Našaj Nivy», kab pahavaryć pra palityku, ideały i chłopcaŭ.

Pavialičyć

U «Moładź BNF» Hanna pryjšła ŭ sakaviku 2017, tolki adśviatkavaŭšy paŭnalećcie.

— Ja cikaviłasia dziejnaściu BNF i raniej, adsočvała ŭ sacsietkach. Na taki moj śvietapohlad u vialikaj stupieni paŭpłyvała maci, jakaja razmaŭlaje pa-biełarusku, ja bačyła takich ža ludziej. Potym vyrašyła dałučycca da moładzievaj supołki BNF. Nu a ŭrešcie pabačyła, što ŭ kiraŭniki vyłučajucca absalutna svabodna, to vyrašyła bałatavacca i pieramahła.

«Naša Niva»: Dyk jakija tvaje pierakanańni?

— Heta idei biełaruščyny, zmahańnia za samaśviadomaść, nacyjanalnuju identyčnaść, svabodu… I «Moładź BNF» — płatforma dla realizacyi hetych idej.

— Čamu heta važna?

— Ja z paślasavieckaha pakaleńnia moładzi, jakoje nie adčuvaje suviazi z toj matrycaj i tymi kaštoŭnaściami. Dla nas važna inšaje. Pahladzicie — maładyja pa-biełarusku pačynajuć havaryć, a kali nie, dyk markirujuć siabie biełarusami niejak inačaj i nie adčuvajuć niehatyvu da «svajho». Tamu biełaj varonaj ja siabie nie adčuvaju: adnahodki mianie abo padtrymlivajuć, abo nijakich emocyj zusim nie adčuvajuć, bo pakul apalityčnyja.

Pakul ja nie staŭlu sabie metaj stać vybitnym palitykam, ja žyvu ciapierašnim — mnie važna dasiahnuć pośpiechaŭ ciaham hetaha hodu ŭ «Moładzi BNF», a dalej — jak pojdzie. Ja taksama siabra BNF, napeŭna, u budučyni budu pracavać i ŭ partyi. U parłamient mahła b bałatavacca tearetyčna.

Pavialičyć

— A jak va ŭniviery spravy?

— Va ŭniviery nijakich prablem u mianie nie było. Ciažka dapuścić, što nichto tam nie viedaje pra toje, čym ja kiruju. Ale nikudy mianie nie vyklikali na razmovy. Kaniečnie, ja čuła, što niekatorych adličvali za palityčnuju aktyŭnaść. Kali adličać, to daviadziecca ŭ Polšču pastupać, ale ciapier ja tut vučusia i źjazdžać nie źbirajusia.

— Kali sama nie płanuješ źjazdžać, to mo dumała, jak viarnuć tych studentaŭ, što pajechali?

— Treba pavyšać jakaść žyćcia.

— Jak?

— Pavyšać kulturu, uzrovień ekanomiki, bolš palityčnych svabod. Sapraŭdnaja demakratyja — heta kali ludziej nie zabirajuć na Akreścina za ŭdzieł u mitynhach.

Pavialičyć

— A što b ty źmianiła ŭ Biełarusi? 

— Adna z prablem Biełarusi — heta sami biełarusy, jakija ŭžo nie vierać u toje, što niešta moža źmianicca i stać lepš, čym jość. Ludzi bačać, što ŭ krainie nie ŭsio vielmi dobra, ale ŭpeŭnieny, što ničoha nie źmieniać. Tamu, maŭlaŭ, chaj tak i budzie, aby b vajny nie było. I ŭ hetym prablema.

Mnie padajecca, što i Łukašenka nasamreč pieramahaje na vybarach, pytańni mohuć być tolki da ličbaŭ padtrymki, u ich ja nie vieru. Ale heta i prablema apazicyi: dla siabie ja nie baču čałavieka, jaki moh by pavieści za saboj narod. A nam patrebny druhi Kalinoŭski, ja dumaju, jaki b daŭ nadzieju.

Pavialičyć

— Dyk my ŭ tupik zajšli? Adkul nam brać novych biełarusaŭ?

— Treba vyrašać prablemy ŭ hałovach biełarusaŭ.

— Jak?

— Heta zaležyć ad samoha čałavieka. Nu i treba raźvivać i prasoŭvać idei biełaruščyny, idei niezaležnaści i zmahańnia.

— Zmahańnia z čym?

— Zmahańnia za svabodu, niezaležnaść.

— Chiba my nie niezaležnyja?

— Dziaržava niezaležnaja, ale možna skazać, što naša svaboda abmiežavanaja ŭ peŭnych momantach. Svaboda słova, svaboda vykazvańnia, svaboda schodaŭ… Navat tyja, jakija jość, nie całkam vykonvajucca.

Pavialičyć

— Jak źbiraješsia spryjać usim tym «treba» jak staršynia «Moładzi BNF»?

— U nas jość stratehija raźvićcia na 2018 hod: heta šerah adukacyjnych sustreč da 100-hodździa BNR, kampanija za pierajmienavańnie parka 50-hodździa Kastryčnika ŭ honar Vasila Bykava, buduć kinapakazy, budzie kampanija «Ja — jeŭrapiejec», skiravanaja na toje, kab moładź adnosiła siabie da jeŭrapiejskaj kultury, nu i ŭ takim duchu. Płanujem taksama pašyrać pradstaŭnictva ŭ rehijonach.

— A da BRSM antypatyi niama ŭ ciabie?

— Napeŭna, adčuvaju. Mnie nie padabajucca ich pakazušnaść i mietady, jakimi jany pryciahvajuć ludziej. Tudy ludziej zmušajuć ustupać, unioski vytrasajuć. A jak zachočaš vyjści, adrazu prablemy pačynajucca. U «Moładzi BNF» jość bereesemaŭcy, jakija prosta nie mohuć vypisacca adtul.

— Davaj ciapier pra žanočaje: ci jość u ciabie chłopiec?

— Ciapier chłopca niama, ja stamiłasia ad adnosinaŭ… Niadaŭna razyšłasia z chłopcam — darečy, paznajomilisia ŭ «Moładzi» — sustrakalisia my paŭhoda, takija adnosiny byli, što za hetyja paŭhoda i stamiłasia.

Ale zalacajucca da mianie časta, asabliva paśla taho, jak u internecie źjaviłasia infarmacyja pra mianie. Pišuć, znajomiacca, niekatoryja kličuć hulać, ale ja pakul nie idu.

A ideała ŭ mianie niama. Navat nie abaviazkova, kab jon byŭ biełaruskamoŭny. Ale siabry dla mianie važniejšyja za chłopca.

Pavialičyć

— A čamu ŭ instahram nie vykładaješ fota ŭ bikini, rujnuješ stereatypy pra druhakurśnic?

— Pa-pieršaje, ja nie viadu instahram u pryncypie: nie lublu fotkacca i nie lublu fotkać, mnie chapaje «Ukantakcie». A jak palityk ja stvaryła sabie staronku ŭ fejsbuku, dzie stasujusia pa pracoŭnych pytańniach.

Pa-druhoje, ja nie taki adkryty čałaviek, kab vykładać fota ŭ bikini.

NN: Nu i paru słovaŭ pra źniešni vyhlad. U internecie ciabie mocna krytykavali za toje, što psuješ miłuju źniešnaść brežnieŭskimi bryvami.

— Ja raniej kampleksavała trochi, bo nie padabalisia rysy tvaru, ale apošnim časam užo nie dumaju pra heta. Kali i jość niejkija niedachopy, to heta maje niedachopy, i ja budu ź imi žyć. A kamu nie padabajucca maje brovy — dyk chaj na sabie ekśpierymientujuć, padbirajuć pryhožyja.

Pavialičyć

• 0
• 0
• 1
• 0
• 0
• 0
• 0
• 0