Druhi pa vieličyni horad u Hrodzienskaj vobłaści naŭrad ci byŭ by takim, kali b u pačatku XIV stahodździa kniaź Hiedymin nie pabudavaŭ tut słavuty zamak. U 2010 hodzie bulvar Čapajeva, jaki ciahniecca ad aŭtavakzała da zamka, pierajmienavali ŭ honar kniazia — zasnavalnika Lidy, a zaraz lidskija mastaki pastavili łahičnuju kropku ŭ pracesie — na budynku mastackaj halerei, što pa Hiedymina 12 — źjaviŭsia murał z partretam kniazia, paviedamlaje budzma.by.
Hetaja halereja adkryłasia u 2016-m. U jaje haspadara Paŭła Macyleviča adrazu ŭźnikła ideja pra hrafici ŭ dvoryku, bałazie ŭ horadzie žyvie mastak Siarhiej Rusak, jaki raniej užo ŭpryhožvaŭ ścieny ŭ Lidzie i ŭ Minsku. Adnak spatrebiłasia jašče trochi času, kab zorki syšlisia i zadumanaje pieratvaryłasia ŭ realizavanaje.
U pačatku minułaha hoda kampanija «Budźma biełarusami!» upieršyniu pryjechała ŭ Lidu z kirmašom prajektaŭ. Adnu z prezientacyj rabiŭ Siarhiej Rusak, jaki prapanoŭvaŭ svaje ruki i talent, kab napoŭnić haradskuju prastoru murałami.
— Tady heta spravakavała ažyćciavić ideju, bo my ŭžo chacieli adkłaści ŭsio jašče na hod. Siarhiej padahnaŭ hetuju spravu, i tak my damovilisia zrabić murał z Hiedyminam, — raskazvaje Pavał Macylevič.
Akramia partreta vialikaha kniazia mastak i haleryst razhladali jašče eskiz z abstrakcyjaj, ale pakolki prastora znachodzicca na bulvary Hiedymina, spynilisia na histaryčnym siužecie.
— Ja staranna šukaŭ partrety Hiedymina. Byli patrebnyja malunki, dzie rysy tvaru pieradadzienyja bolš jakasna za karcinki ŭ Vikipiedyi. Eskiz ja zrabiŭ pa sučasnych litoŭskich manietach, — raskazvaje Siarhiej.
Pavał havoryć, što ŭładalnik pamiaškańnia ŭspryniaŭ ideju murała vielmi pryjazna. Nieŭzabavie haspadar halerei płanuje zadziejničać uvieś dvoryk. U prajekta ŭžo i nazva jość: art-dvoryk «ZADVORAK».
— Tak što siońnia «cichaja» prezientacyja. Kali stanie ciopła, zrobim prezientacyju ŭ dvoryku, — kaža Pavał. — Chtości ŭbačyŭ u murale adbitak palca, chtości — zrez dreva, chtości — usiobačnaje voka. Atrymałasia vielmi pryšpilna. Ja ŭpeŭnieny, što heta pačatak historyi.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary