Alaksandr Łukašenka siońnia pravioŭ tradycyjny pryjom na stary Novy hod, paviedamlaje jaho pres-słužba.
Ciapierašniaje pakaleńnie biełarusaŭ žyvie ŭ vielmi niaprosty čas. Kažučy pra toje, jak raźvivajecca Biełaruś, pra jaje stanovišča ŭ chutkaźmienlivym śviecie Łukašenka adznačyŭ, što ŭ nas niama nijakaj mahčymaści adharadzicca ad niehatyŭnych pracesaŭ. «Treba ŭmieć im supraćstajać, — padkreśliŭ kiraŭnik dziaržavy.
— My pavinny navučycca žyć u hetym śviecie, dzie treba prystasoŭvacca, ale ni ŭ jakim razie nie stracić svaju identyčnaść, karani, ad jakich raście naša biełaruskaja nacyja».
Zakranajučy pierśpiektyvy, Łukašenka adkryta i biez usialakaha papulizmu adznačyŭ, što lohka nie budzie.
«I navat, napeŭna, lahčej nie budzie, čym u minułym, 2017-m abo ŭ byłyja hady. Ale my pastavili pierad saboj ambicyjnyja zadačy, i, čaho b heta nam ni kaštavała, my pavinny dasiahnuć hetych rubiažoŭ. Kali my nie budziem rabić hetaha z hodu ŭ hod, dni našaj biełaruskaj dziaržaŭnaści buduć źličanyja», — skazaŭ Alaksandr Łukašenka.
Jak budzie raźvivacca kraina i jakoj joj być u budučyni, zaležyć ad kožnaha hramadzianina. «Žyćcio ŭ nas nie pryŭkrasnaje i navat nie dobraje. Pakul my žyviem ciarpima», — skazaŭ Alaksandr Łukašenka. Pavodle słoŭ kiraŭnika krainy, u Biełarusi raźličvajuć na palapšeńnie situacyi.
Zakranajučy staŭleńnie da pośpiechaŭ krainy jak unutry jaje, tak i za miažoj, kiraŭnik dziaržavy nahadaŭ kryłaty vyraz:
«Sumna, kali ŭ vas niama siabroŭ. A jašče bolš sumna, kali niama vorahaŭ». «Napeŭna, i toje, i inšaje ŭ nas jość. Značyć, my jašče majem niekatoryja pierśpiektyvy», — dadaŭ jon.
Kamientary