Aktyvist stvaryŭ sajt, jaki dapamahaje sačyć za vykanańniem abiacańniaŭ čynoŭnikaŭ
Brasłaviec Pavieł Savicki, jaki ciapier žyvie ŭ Minsku, raspracavaŭ sajt promise.by. Ź jaho dapamohaj kožny biełarus moža pahladzieć, ci sapraŭdy ŭ 2018 hodzie bolš nie padaražajuć kamunalnyja pasłuhi, ci dabudujuć, narešcie, centr mastackaj himnastyki i hetak dalej.
Na sajcie vyrazna bačna, jakija abiacańni znachodziacca ŭ pracesie vykanańnia, a jakija tak i zastalisia słovami. Darečy, kantralavać možna nie tolki čynoŭnikaŭ, ale i inšych miedyjnych asob: naprykład, Viktoryja Azaranka źbirałasia vystupić na turniry ŭ Brysbenie, ale hetaha nie adbyłosia.
«Ja daŭno pačaŭ źviartać uvahu na toje, što praktyčna ŭsie naviny ŭ nas tyčacca budučyni. Pierahladzicie vypuski na dziaržaŭnym telebačańni — i vy sami heta lohka zaŭvažycie. Usie abiacańni, jakija ahučvajucca z ekrana televizara, raźličanyja na toje, što praz peŭny čas pra ich amal zabuducca. Akramia taho, dzie ž znajści šmat nahod dla radaści, jak nie ŭ budučyni Biełarusi? Karaciej, mianie ŭsia heta situacyja vielmi razdražniała i padumałasia: «Kruta, kali b u Biełarusi byŭ taki prajekt, jaki dapamahaŭ by prasačyć za vykanańniem kožnaha takoha abiacańnia». Ale pakolki maja profilnaja adukacyja nie była źviazanaja z prahramavańniem (ja skončyŭ budfak BNTU), ja niejki čas spadziavaŭsia, što chto-niebudź inšy zojmiecca takoj idejaj. Ale hetaha nie adbyłosia, tamu ja pačaŭ vyvučać prahramavańnie samastojna», — raskazvaje pra pracu nad svaim prajektam Pavieł.
Sajt tolki pačaŭ funkcyjanavańnie i na dadzieny momant źmiaščaje 60 raznastajnych abiacańniaŭ, jakija Pavieł samastojna znajšoŭ u archivach roznych infarmacyjnych krynic. Ale jon choča, kab kožny biełarus dadavaŭ takija temy samastojna. U budučyni Pavieł płanuje dadać na sajt mahčymaści prahladać abiacańni pa temach (sport, ekanomika, ŽKH i inšyja), a taksama filtravać ich pa rehijonach, bo minčuka cikavić adno, a žychara Mahilova — zusim inšaje.
«Maja hałoŭnaja meta — kab biełarusy daviedalisia pra ludziej, jakija kirujuć krainaj, pra ich słovy i toje, ci mohuć jany ich strymać. Ja amal upeŭnieny, što tolki redki naviedvalnik sajta budzie ŭ temie chacia b pałovy proźvišč hetych pierson. U nas usie viedajuć tolki adno proźvišča: jon va ŭsim i vinavaty i jon — hieroj usich padziej. Chočacca pašyryć kruhahlad nasielnictva, nakolki heta mahčyma», — tłumačyć matyvacyju chłopiec.
Kamientary