U 21-m numary «Dziejasłova» nadrukavanyja novyja apaviadańni Leanida Drańka-Majsiuka. U ich aŭtar daje volu movie – i jana raźlivajecca šyroka, niby Haryń, i vynosić piśmieńnika daloka za ramki dazvolenaha. Cikava nazirać, jak zvarot da karennaj, davyd-haradockaj dasavieckaj movy raźniavolvaje myśleńnie, robić jaho taksama dasavieckim. Darečy, mienavita Ł.Drańko-Majsiuk staŭ laŭreatam premii «Dziejasłova» «Załaty apostraf» u halinie prozy za 2005 hod.
U tym samym numary – novy histaryčny raman Kastusia Tarasava «Aŭdytarskaja pravierka ŭ Niaśvižy, albo Skarb Niaśviskaha zamku» z žyćcia Biełarusi 250-hadovaj daŭniny, časoŭ zaniapadu Rečy Paspalitaj.
Narodny paet Biełarusi Nił Hilevič raspačaŭ vydruk svaich memuaraŭ – pieršaja častka, praŭda, vyhladaje zanadta tradycyjna, joj brakuje niečakanaściaŭ. Pobač – pačatak chiba zaŭčasnych memuaraŭ Uładzimiera Arłova.
U tym ža numary – šmat vieršaŭ Ryhora Baradulina.
U travieńskim «ARCHE» drukujecca šedeŭr Ryšarda Kapuścinskaha – raman «Imperatar» pra žyćcio, caravańnie i skon apošniaha nehusa Etyjopii Chajle Sełasje. Darečy, polski piśmieńnik Kapuścinski – adzin z naminantaŭ na Nobeleŭskuju premiju, naš ziamlak. Jon rodam ź Pinsku, i ŭ vieraśni sioleta maje adviedać svaju małuju radzimu.
Pad krytyčnym mikraskopam «ARCHE» hetym razam akazaŭsia ŭhanaravany prezydenckaj premijaj raman Alesia Navaryča «Litoŭski voŭk».
Andrej Chadanovič drukuje svajo ese, napisanaje pad uražańniem Płoščy.
A nieadmienna varta pračytać u hetym numary ese «Try dni, try z pałovaj nočy i dziesiać sutak» Andreja Baranava – najlepšaje, što było napisana pra padziei Sakavika. Płošča, namiotavaje miastečka i turma vačyma junaka, jaki ŭsio heta prajšoŭ.
Mikoła Buhaj
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym3
Kamientary