Biełaruś pieramiaściłasia z 7 (samaj horšaj) u 6 hrupu krain pa kłasifikacyi kredytnaj ryzyki ŭ rejtynhu Arhanizacyi ekanamičnaha supracoŭnictva i raźvićcia (AESR), jakaja abjadnoŭvaje raźvityja krainy śvietu. Infarmacyja pra heta raźmieščana na sajcie AESR.
Siońnia Biełaruś susiedničaje z Armienijaj, Arhiencinaj, Bieninam, Kamierunam, Jehiptam, Ekvadoram, Hruzijaj, Hanaj, Jamajkaj, Kazachstanam, Papua — Novaj Hviniejaj, Turkmienistanam, Manholijaj i šeraham inšych krain.
Biełaruś praciahły čas žyła na samym dnie hetaha rejtynhu. Biełaruskija ŭłady ŭ apošnija 2 hady viali aktyŭnyja pieramovy z nahody palapšeńnia situacyi. Reč u tym, što hety rejtynh ŭpłyvaje na košt resursaŭ u zachodnich bankach. Z-za prysutnaści krainy ŭ horšaj hrupie krain biełaruskim pradpryjemstvam zanadta doraha pryciahvać ekspartnyja kredyty bankaŭ z raźvitych krain na kuplu impartnaha abstalavańnia. Zamiežnyja finansavyja instytuty farmirujuć košt resursaŭ z ulikam krainavych ryzyk mienavita pa kłasifikacyi AESR.
AESR ranžyruje krainy pa 8 katehoryjach ryzyki. Krainy z vysokim uzroŭniem dachodaŭ aŭtamatyčna adnosiacca da nulavoj katehoryi. Astatnija raźmierkavanyja pa 7-mi hrupach u zaležnaści ad acenki kredytnaj ryzyki, na asnovie analizu 3-ch hrup pakazčykaŭ: praktyki ažyćciaŭleńnia płaciažoŭ, finansavaha stanu krainy i jaje ekanamičnaj situacyi.
Charakterna, što ŭčora mižnarodnaje rejtynhavaje ahienctva Fitch Ratings pavysiła doŭhaterminovyja rejtynhi defołtu emitenta Biełarusi ŭ zamiežnaj i nacyjanalnaj valucie da ŭzroŭniu «B» z «B-» sa «stabilnym» prahnozam. Jak adznačana ŭ paviedamleńni ahienctva, karotkaterminovyja ryzyki zamiežnaha finansavańnia Biełarusi źmienšylisia z pryčyny papiaredniaha reziervavańnia finansaŭ u 2017 hodzie pad płaciažy 2018 hoda, a taksama z-za pavieličeńnia zołatavalutnych reziervaŭ da 7,3 młrd dalaraŭ.
