Z 31 studzienia 2018 hoda ŭstupili ŭ siłu źmianieńni i dapaŭnieńni ŭ KaAP i PVKaAP, jakija datyčacca adkaznaści za parušeńnie niekatorych punktaŭ PDR. Va UDAI MUS raspaviali padrabiaznaści.
Nahadajem, havorka idzie pra źmieny ŭ artykułach, jakija tyčacca kiroŭcaŭ i učynienych imi niaznačnych pravaparušeńniach. Papraŭki ŭ druhim čytańni ŭchvalili deputaty ŭ śniežni minułaha hoda.
Kiroŭcaŭ nie buduć štrafavać za zabytyja dakumienty (artykuł 18.18 KaAP). Raniej za adsutnaść dakumientaŭ štraf składaŭ ad 0,1 da 2 bazavych vieličyń. Zaraz kiroŭca moža być pryciahnuty da adkaznaści pa č. 5 art. 18.22 KaAP (Inšyja parušeńni), jakaja praduhledžvaje papiaredžańnie abo štraf u pamiery da 0,5 b.v.
- Tym nie mienš, kiroŭcam nie varta hetym złoŭžyvać. Pracedura pravierki najaŭnaści dakumientaŭ pa adpaviednych baz danych praduhledžvaje peŭnyja časovyja zatraty. Akramia taho, u sistemie moža adsutničać infarmacyja ab dakumientach, vydadzienych daŭno. U hetym vypadku spatrebicca dadatkovaja pravierka, — padkreślili va UDAI MUS.
Za paŭtornaje (na praciahu adnaho hoda) kiravańnie transpartnym srodkam asobaj, jakaja nie maje prava kiravańnia, praduhledžany taksama administracyjny aryšt na termin da 15 sutak. Takaja katehoryja spraŭ budzie razhladacca sudami.
Adnym z novaŭviadzieńniaŭ stanie skasavańnie pracedury kanfiskacyi tałona da vadzicielskaha paśviedčańnia pry nakładańni štrafu. Kiroŭcu nie treba budzie naviedvać DAI, kab viarnuć dakumient.
Taksama pavialičany termin vypłaty štrafu, jaki inśpiektar DAI nakładaje na miescy, ź piaci dzion da miesiaca. Apłacić jaho možna z dapamohaj sistemy «Raźlik» (ARIP) albo na miescy z vykarystańniem apłatnaj karty praz mabilny terminał. Adnak u vypadku niavypłaty albo propusku dadzienaha terminu administracyjnaje spahnańnie aŭtamatyčna pavialičvajecca na 2 b.v.
Źmieny ŭ art. 18.17 KaAP (ździajśnieńnie DTZ) praduhledžvajuć, što pry afarmleńni DTZ, u jakim udzielniku nie naniesieny cialesnyja paškodžańni, a majucca tolki miechaničnyja paškodžańni transpartnych srodkaŭ abo paškodžańni majomaści, kiroŭca pryciahvajecca da adkaznaści za parušeńnie kankretnaha punkta (-aŭ) PDR, jakoje stała pryčynaj zdareńnia. Kali ŭdzielniki DTZ składajuć «jeŭrapratakoł», jany nie pryciahvajucca da administracyjnaj adkaznaści.
Dadamo, što raniej prapanoŭvałasia nie pazbaŭlać pravoŭ vadzicielaŭ za paŭtornaje na praciahu hoda pieravyšeńnie chutkaści. Adnak hetaja norma nie była ŭchvalena.
Kamientary